Puntland oo da'yarta ku boorisay ka shaqeynta amniga iyo horumarka
-
Puntland State House + GO
- Posted On 24-07-2019, 02:57PM
QARDHO, Puntland - Madaxweyne Ku-xigeenka dowladda Puntland ayaa kulan la qaatay dhallinyarada magaalada Qardho, kulankaas oo looga hadlayey doorka dhallinyaradu ku leeyihiin horumarinta dalka.
Kulanka waxaa Axmed Cilmi Cismaan Karaash ku wehlinaayey xubno ka tirsan Golaha Wasiirada, Guddoomiyaha gobolka Kar-kaar, Duqa degmada Qardho, dhallinyaro iyo marti sharaf kale.
Karaash ayaa soo dhaweeyey kulamada noocaan oo kale ah oo dhallinyaradu ay kaga hadlayaan horurmarinta Puntland iyo sidii ay qaybtooda u qaadan lahaayeen.
Isaga oo hadalkiisa sii wata ayaa waxa uu tilmaamay in dhalinyarada ku dhaqan degaanadda Puntland ay tusaale lagu daydo u yihiin dhallinyarada dhiggooda ah.
Madaxweyne Karaash ayaa dhallinyarada ku booriyey inay ka faa'iidaystaan fursadaha shaqo ee waddanka yaala, kuwaas oo ay ka midyihiin tabcashada Beeraha, Kalluumaysiga iyo farsamada gacanta.
Waxa uu uu caddeeyey in dowladda Puntland ay dhinacyadaasi xoogga saari doonto horumarintooda.
Ugu dambayn, Madaxwweyne Ku-xigeenka ayaa wuxuu da'yarta Puntland kula dar-daarmay inay ilaashadaan Amniga iyo horumarka degaanada Puntland.
Puntland State House
