Saraakiil Ethiopia lagu soo tababaray oo la kulmey Madaxweynaha
-
- Posted On 20-05-2015, 05:39PM
May 20, 2015 (GO)- Madaxweynaha Puntland Cabdiweli Maxamed Cali Gaas ayaa gelinkii dambe ee maanta aqalka Madaxtooyada dawladda Puntland ee Garoowe kullan kula qaatay saraakiil ciidan oo katirsan ciidanka Puntland, kuwaasoo Ethiopia tababar kusoo qaatey islamarkaana dhowaan dalka kusoo laabtey.
Madaxweynaha Puntland Cabdiweli Maxamed Cali Gaas ayaa uga mahadceliyey dawladda Ethopia tababarka ay siisay saraakiishan ciidan oo udub dhexaad u ah ciidanka Puntland, waxaana uu kula dardaarmay in aqoonta ay soo barteen dib dalkooda ugu celiyaan.
Saraakisha soo qaatay tababarka waxaa ay dhankooda sheegeen inay diyaar u yihiin ka qeyb qaadashada kor uqaadista tayada iyo waxbaridda ciidanka Puntland iyo weliba sidii dalka loo difaaci lahaa ammaankana loo sugi lahaa.
Ethiopia oo Puntland uu kala dhexeeyo xiriir dhinacyo badan leh, waxay dhowr mar oo hore Puntland gacan ka siisey tababarista saraakiisha ciidamada ammaanka.
GAROWE ONLINE
