Shir laga yeeshay amniga doorashooyinka Puntland

Doorashadan oo ah mid horudhac ah waxaa ku baratami doona 10 urur siyaasadeed kuwaas oo haatan ku guda jiro olole.

GAROWE, Puntland - Wasaaradda Amniga iyo DDR ee Dawladda Puntland ayaa gudoomisay shir looga hadlayay Amniga doorashooyinka dawladaha hoose ee degmooyinka degmoooyinka Eyl, Ufeyn iyo Qardho.

Kulanka waxaa kasoo muuqdey Gudoomiyaha Gudiga Kumeel Gaarka ah ee Doorashooyinka (TPEC),Wasiirka Arimaha Gudaha Puntland.),  Lataliyaha Amniga Madaxweynaha iyo Taliyaha Booliiska Puntland.

Sidoo kale, madasha waxaa goobjoog ka ahaa Taliyaha Ciidanka Difaaca Puntland, Agaasimaha Waaxda Amniga, Hay'adda Sirdoonka Puntland iyo saraakiil kale oo amni.

"Shirka ayaa kusoo dhamaaday is afgarad iyo go'aamo lagu sugayo amni doorashooyinka Dawladdaha Hoose ee soo foodaleh," ayaa lagu yiri qoraal kasoo baxay Wasaardda amniga Puntland.

Doorashadda ayaa qorshuhu yahay in ay bilaabato 25-ka bishan October. Doorashadan oo ah mid horudhac ah waxaa ku baratami doona 10 urur siyaasadeed kuwaas oo haatan ku guda jiro olole.

Dhamaan Ururada siyaasada Puntland ayaa si wadajir ah uga soo muuqdey dooda ayaga oo dadweynaha u soo bandhigay barnaamijkooda siyaasadeed kahor doorashada dowladaha hoose ee horudhaca ah.

Nidaamka xisbiyada badan ayay Puntland kaga gudbeysaa habka qabiilka oo tabashooyin badan abuuray wallow maamulku kusoo caana-maalay hase ahaatee waxaa la sheegay in la joogo xilligii lasoo afmeeri lahaa.

GAROWE ONLINE