Shirka Galkacyo iyo waxyaabaha looga hadlay
-
- Posted On 28-08-2015, 10:23AM
28 August, 2015 (GO)-Magaalada Galkacyo ee xarunta gobolka Mudug waxaa weli ka socda shirka wadatashiga Puntland oo lagu wado in la soo xirey barrito(Sabti).
Shirka intii uu socdey waxaa looga hadlay arrimo muhiim ah oo ku saabsan marxalada haatan Puntland mareyso, tabashooyinka jira, sixidda wixii khaldan, ammaanka iyo gobolada ka maqan Puntland.
Ergooyin kala duwan oo ka hadlay shirkan intuu socdey waxay sheegeen in Puntland gaabis ka tahay dhinacyada hormarka iyo siyaasadda, halka qeyb kale sheegeen inay jiraan waxyaabo lagu amaani karo maamuladdi soo qabtey talada Puntland.
Madaxweynaha Puntland Cabdiwali Maxamed Cali Gaas ayaa loo soo jeediyay inuu dhaqso u hirgaliyo nidaamka asxaabta badan oo ballan qaaday waqtigii uu tartamayay jagada Madaxweynaha Puntland, ergada shirkaasina sheegeen inay tahay habka kaliya ee looga gudbi karo khilaafaadka soo noq-noqda.
Sabtida bari ah ayaa lagu wadaa in la soo xiro shirkaasi oo 25 August ka furmay magaalada Galkacyo.
Garowe Online ayaa shacabka Puntland u ballan qaadeysa u soo gudbinta shirkaasi iyo waxyaabaha ka soo baxa.
GAROWEONLINE
