Siciid Xasan Shire: Puntland uma baahna ciidamo ka tirsan AMISOM
-
- Posted On 13-05-2015, 09:30AM
May 13, 2015 (GO)- Guddoomiyaha Baarlamaanka Puntland Siciid Xasan Shire ayaa sheegay in Puntland u baahneyn ciidamo ka tirsan kuwa nabad ilaalinta ee AMISOM, maadama ay awood buuxda u leedahay sugidda amniga deegaanadeeda.
Mudane Shire ayaa warkan sheegay mar uu shalay ka hadlayey shir lagu gorfeynayey la-dagaalanka argagixisada oo lagu qabtey xarunta baarlamaanka ee Garowe.
Hay'adaha amniga ee Puntland ayuu sheegay in ay awood buuxda u leeyihiin ilaalinta nabad galyada iyo ka hor tegista wax kastoo nabad galyada khalkhal galin kara.
"Amisom iyo ciidan uma baahnin annagaa isku filan...hay'adaha amnigu waa ku filan yihiin amniga waana difaaci karaan, haddii wax khaldan yihiinna waa la saxayaa..." ayuu yiri.
May 9, 2015 ayey ahayd markii Ergeyga Qarmada Midoobey ee Soomaaliya Nicolas Kay, wareysi gaar ah oo uu siiyey Reuters ku sheegay in la qorsheynayo sidii ciidamo ka tirsan AMISOM loo geyn lahaa Puntland.
Puntland ayaa horay marar badan uga codsatey Qaramada Midoobey iyo Midowga Africa in laga taageero dagaalka ay kula jirto ururka Al-shabaab.
GAROWE ONLINE
