Soomaaliya: Buuq hareeyay fadhigi Barlamaanka Puntland.

GAROWE, Puntland - Xildhibaanada Gollaha Wakiilada Puntland oo Maanta lahaa fadhigoodi caadiga ahaa ayaa qorshuhu ahaa in ay ka hadlaan arimaha Deegaanka.

Hase ahaate mudanayaasha Gollaha xubno kamid ah gaar ahaan Xildhibaan, Axmed Jaamac Daad oo ay isku qoys yihiin Madaxweynaha xilka kasii dagaya, Siciid Cabdulaahi Deni ayaa keenay dood ah in laga hadlo Amniga Caasimada Garowe.

Mudanayaashan kooban ayaa ku dooday in ay doonayaan in fadhiyada Barlamaanka laga raro Garowe, islamarkaana loo wareejiyo magaalada Qardho ee xarunta gobalka Karkaar.

Xildhibaanada ayaa kala ah: Axmed Daad, Dhaashane, Sharmaake, Abdirashiid Af-Guduud, iyo Cali Cabdiwaaxid.

Madaxweyne Siciid Cabdulaahi Deni ayaa dadaal ku bixinaya in uu fadhi ka dhigto Qardho halkaasi oo sida la rumeysan yahay uu doonayo in uu ka meel mariyo doonistiisa muddo kororsiga.

Gollaha wakiilada dowladda Puntland oo uu saldhig u ahaa caasimada Puntland ee Garowe rubuc qarni ay Puntland jirto horey looma keenin dood noocaan ah.

Fadhiga ayaa ku dhamaaday buuq kedib markii ay dood kala hortageen mudanayaasha Gollaha ee diidan qodobkaan.

Kulamo u socday Madaxweynaha ay bilooyinka uga hareen mudada xilhayntiisa Dastuuriga ah iyo Isimada ayaan wali laga soo saarin war rasmi ah.

GAROWE ONLINE