Xildhibaan Siciid Nuur Cagool oo Galkacyo lagu diley
-
- Posted On 08-05-2015, 04:10PM
May 8, 2015 (GO)- Xildhibaan ka tirsanaa barlamaanka Puntland ayaa caawa lagu diley magaalada Gaalkacayo ee xarunta gobolka Mudug.
Xildhibaan Siciid Nuur Dirir (Siciid Lugool) oo kamid ahaa mudanayaasha siyaasad ahaan aad ugu dhow madaxweynaha Puntland Cabdiwlei Cali Gaas ayaa waxaa toogtey dabley hubeysan salaadii maqribka kaddib, isagoo kasoo baxaya masjidka Abu Hureyra ee xaafadda Israac.
Dableyda dilka fulisey oo aan ilaa iyo hadda haybtooda la aqoonsan ayaa tacshiirad ku furey xildhibaanka kadibna labo bumbo oo nooca gacanta ah tuurey.
Waa xildhibaankii labaad oo ka tirsan Barlamanka Puntland ee muddo bil gudaheed ah weerar qorsheysan lagu dilo. Bishii lasoo dhaafey ee April 18-keedii, waxaa magaalada Muqdisho sidan oo kale loogu toogtey Xildhibaan Aadan Xaaji Xuseen.
GAROWE ONLINE
