Xukuumadda Deni oo ku eedeysay Mucaaridka inaysan doonayn wadahadal

Dallada Mucaaradka Puntland ayaan weli ka jawaabin eedeynta Dowladda.

GAROWE, Soomaaliya - Dowladda Puntland ayaa maanta ku eedeysay siyaasiyiinta mucaaradka ah inaysan diyaar u ahayn wadahadal lagu xaliyo khilaafka doorashada.

Wasiirka Arrimaha Gudaha ahna Guddoomiyaha Guddiga Wada-xaajoodka Doorashada Puntland Cabdi Faarax Juxaa ayaa eedeyn culus u jeediyay mucaaradka, isaga oo leh:

“Dallada Mucaaridku waa diideen in ay nala fadhiistaan oo nala hadlaan, waxa ayna na tuseen in aysan wada-hadal diyaar u ahayn.”

Wasiir Juxaa ayaa intaasi ku daray “Waxaanu u aragnaa in arrintan xalkeedu yahay wada-tashi, haddii aan laga wada-hadlinna xal ma gaari karno, haddana waxa aanu ku baaqaynaa wada-hadal.”

Dhinaca kale, Dallada Mucaaradka Puntland ayaan weli ka jawaabin eedeynta Dowladda ee ku aadan inaysan diyaar u aheyn wax wadahadal ah.

​Madaxweynaha xilka ka degaya Siciid Cabdallah Deni ayaa wasiir Juxaa u magacaabay inuu maareeyo faylka wadahadalada mucaaradka iyo maamulka talada haya.

Madaxweynaha xilka ka degaya ayaa tan iyo markii uu guddiga dhisay qaaday tallaabooyin lagu tilmaamay kuwo ka hor imaanaya baaqiisa wadahadal.

GAROWE ONLINE