3,000 askar Soomaaliya oo lagu tababaray 3 bil gudaheeda
-
WARIYAHA MUQDISHO GAROWE ONLINE
- Posted On 20-03-2023, 03:17AM
MUQDISHO, Soomaaliya - Madaxweyne Xasan Sheekh Maxamuud oo uu wehelinayo dhiggiisa waddanka Uganda Yoweri Museveni ayaa tababbar u soo xiray illaa 3,000 ciidamo kamid noqonaya Soomaaliya oo ku dhowaad saddexdii bilood lasoo dhaafay lagu tababaray dalkaas.
Xasan Sheekh ayaa khudbadda uu u jeediyay halyeeyadan u istaagay difaaca dalkooda, waxa uu tilmaamay in muhiimadda koowaad ay dowladdu saareyso dib u habaynta Ciidanka Qaranka.
Madaxtooyadda Soomaaliya ayaa shaaca ka dhigtey in ciidamadda ay "aas-aas u yihiin dowladnimada dalkeenna iyo in guul deg-deg ah laga gaaro dagaalka dalka lagaga sifaynayo argagixisada".
"Cutubyada ciidamadan ayaa Madaxweynaha u soo bandhigay dhoolla-tus ay ku muujinayaan tayadooda iyo tababarrada ay qaateen," ayaa la raaciyey qoraalka Villa Soomaaliya.
Saraakiisha iyo Saraakiil Xigeennada Cutubyadan ayaa "Madaxweynaha uga mahadceliyay mudnaanta uu siiyey in uu dul istaago nolashooda iyo tababarrada ay qaateen, waxayna muujiyeen sida ay uga go’an tahay in ay safka hore ka galaan howlgallada xoreynta dalka".
Ugu dambeyn, Madaxweyne Xasan Sheekh ayaa uga mahadceliyey "dowladda Uganda taageerada naf hurnimada leh ee ay siiso shacabka iyo dowladda Soomaaliyeed. Sidoo kale, dowladda Imaaraadka Carabta ayuu uga mahadceliyey bixinta qarashaka ku baxay Tababarka ciidanka".
GAROWE ONLINE
