Agaasimaha CIA-da Mareykanka oo safar qarsoodi ah ku tagey Muqdisho

MUQDISHO, Soomaaliya - Agaasimaha CIA-da William J. Burns ayaa booqasho qarsoodi ah ku yimid magaalada Muqdisho Khamiistii, taasoo muujineysa in Mareykanka uu aad u daneynaya arrimaha dalka iyo guud ahaan gobolka Geeska Afrika, xilli ay kordhayaan xiisadaha diblomaasi.

Intii uu ku guda jiray kulanka uu la yeeshay madaxweynaha Soomaaliya Xasan Sheekh Maxamuud iyo agaasimaha NISA Sanbaloolshe, Burns waxa uu diiradda saaray horumarinta wadaagga sirdoonka, dadaallada la dagaalanka argagixisada, iyo in laga gudbo xiisadaha ka dhashay heshiiskii badda ee Itoobiya ay dhawaan la gashay Somaliland.

Xiisada ayaa cirka isku sii shareertay bishii Oktoobar markii madaxweyne Xasan Sheekh Maxamuud uu ku biiray shir madaxeedkii Asmara uu kula yeeshay madaxda Masar iyo Ereteriya, iyagoo sameeyay isbahaysi amni oo looga dan leeyahay in lagu xakameeyo saamaynta gobolka ee Itoobiya, taasoo keeni karta colaad ballaaran.

Waa safarkii labaad uu Burns ku tago Muqdisho sanadkan, iyadoo horay u yimid bishii January 2024. Booqashooyinkiisa waxa ay hoosta ka xariiqeen dadaallada Mareykanka iyo Soomaaliya ee socda ee ka dhanka ah Al-Shabaab.

Burns waxaa lagu wadaa inuu booqdo Addis Ababa, taasoo muujineysa dadaalka Mareykanka uu ku doonayo inuu ku dhexdhexaadiyo xulafada Itoobiya ee gobolka Geeska Afrika iyo khilaafaadka gobolka.

Mareykanka, ayaa caado ahaan diiradda saaraya la dagaalanka argagixisada Soomaaliya, waxa uu wajahayaa caqabado kala duwan oo ka imaanaya xulafada cusub ee Soomaaliya oo ah Masar, kuwaas oo keeni kara xasilooni darro hor leh iyo xoojinta dagaalka Al-Shabaab.

GAROWE ONLINE