Al-shabaab oo deegaano gobolka Bay ka tirsan isgaarsiinta ka jartey
-
- Posted On 08-12-2014, 04:20AM
December 8, 2014 (GO)- Wararka laga helayo gobolka Bay ayaa sheegaya in Ururka Al-shabaab xiray qaar kamid ah xarumaha shirkadda isgaarsiinta Hormuud. Deegaanada khadka telefoonka laga jaray waxaa kamid ah Ufurow iyo Diinsoor.
Lama oga sababta Al-shabaab go'aankan isaga ah u qaadatey haseyeeshee waxay kooxdu inta badan jartaa khadka isgaarsiinta xilliyada ay ka war hesho dhaq dhaqaaqyo ciidan oo dhankeeda kusoo wajahan ama ay doonayso inay iyadu dhaq dhaqaaq samayso.
Sanad kahor, Al-shabaab waxay internetka moobillada laga isticmaalo ka mamnuucay dhamaan deegaanada ay ka taliso, kadib markii ay soo wajahday cabsi dhanka basaaska ah, duqeymaha diyaaradaha bilaa duuliyaha ah ee Maraykuna kordheen.
Telefoonnada gacanta ee casriga ah ayaa marka khadka internetka lagu xiro waxay leeyihiin adeegyo badan oo GPSku (Global Positioning System) kamid yahay. GPS-ku (Habka Jiheynta ee Caalamiga ah) wuxuu awood u leeyahay inuu sheego meesha qofka isticmaalayaa joogo iyo weliba masaafada deegaanada kale u jiraan.
Amarkan cusub ee Al-shabaab soo saartey wuxuu kusoo aadayaa todobaadyo kadib markii dowladda Putland ee Madaxweyne Cabdiweli Maxamed Cali Gaas hoggaamiyo amar ku siisey shirkadda Golis inay hawada ka saarto dhowr shabakadaha Soomaalida ee wararka laga daalacdo ah.
GAROWE ONLINE
