Baarlamaanka PL oo go'aan ka gaaraya xeerka gudiga doorashooyinka
-
- Posted On 06-12-2014, 04:01AM
December 6, 2014 (GO)- Baarlamaanka Puntland ayaa maanta u codeyn doona ansixinta xeerka gudiga doorashooyinka Puntland kadib markii wax laga bedeley qaar kamid ah qodobada xeerkaas oo markii ugu horeysey la meel mariyey January 2, 2011.
Xeerkan oo bishii hore ee November Golaha Wasiirradu ansixiyeen, waxaa xildhibaannada baarlamaanka Puntland loo qaybiyey maalintii Talaadada ee lasoo dhaafay.
Qodobada wax laga bedeley ee xeerkan ku jira waxaa kamid ah qodobka sagaalaad oo qeexayey xil ka qaadista xubnaha guddiga doorashooyinka iyo weliba sababaha keeni kara in xubin guddigaas ka tirsan xilka laga xayuubiyo.
Xeerkii guddiga doorashooyinka ee xukuumaddii Madaxweyne Farole wuxuu qodobkiisa sagaalaad dhigayey in xubintii lagu helo anshax xumo, musuqmaasuq ama xatooyo xoolo dadweyne xilkeeda waayi doonto.
Kalfadhiga 34-aad ee Golaha Wakiillada Puntland oo ajendayaashiisa ugu muhiimsanaayeen la xisaabtanka xukuumadda iyo hay'adaha kale ee dowliga ah, ammaanka, miisaaniyadda sanadka 2015 iyo dhaqaalaha, wuxuu soo xirmi doonaa sagaalka bishan socota ee December.
GAROWE ONLINE
