Ciidamada Puntland oo Gacanta Ku Dhigay Xarumo Muhiim ah oo Daacish laga saarey

BOOSAASO, Puntland – Ciidamada difaaca Puntland ayaa si rasmi ah u xaqiijiyey inay la wareegeen xarumo waaweyn oo ku yaalla buuraha Calmiskaad. Saldhigyadan waxay ku yaallaan deegaannada Hadi-dharin iyo Hadi-xanan oo istiraatiijiyad ahaan muhiim ah dagaalka Ciidanka.

Saraakiisha ciidamada ayaa sheegay in hawlgalka oo si taxaddar leh loo fuliyey lagu guuleystay in la soo qabto agab muhiim ah oo ay ku jiraan baasaboorro caalami ah, keyd shidaal, sahay ciidan, iyo qalab kale oo muhiim ah oo ay kooxaha nabad-diidku isticmaali jireen.

Afhayeenka ciidamada Puntland ayaa sheegay in hawlgalkan uu yahay mid qeyb ka ah dadaallada joogtada ah ee lagu xaqiijinayo amniga gobolka iyo soo afjaridda kooxaha argagixisada ah ee ku dhuumaaleysanaya buuraha Calmiskaad.

"Waxaan sii wadi doonnaa hawlgaladeenna illaa aan ka xaqiijino in kooxaha dhibaatada wada laga ciribtiro deegaannadan," ayuu yiri afhayeenku.

Guushan ayaa waxaa lagu tilmaamay inay tahay tallaabo muhiim ah oo lagu xoojinayo nabadda iyo amniga guud ee Puntland, iyadoo dadweynaha deegaanku ay soo dhoweeyeen horumarkan.

Waxaa la filayaa in dowladda Puntland ay soo bandhigto faahfaahin dheeraad ah oo ku saabsan natiijada hawlgalka iyo qorshayaasha amniga ee mustaqbalka dhow.

GAROWE ONLINE