Ciiddamo Hubeysan iyo Gaadiidka Millateriga Oo Laga Mamnuucay Garoonka Aden Adde

MUQDISHO, Soomaaliya - Dowladda Federaalka Soomaaliya ayaa soo saartay shalay amar ka mamnuucaya in ciidamo hubeysan iyo gaadiidka millateriga ay soo galaan agagaarka Garoonka Diyaaradaha Aden Adde ee Muqdisho. Go'aankan ayaa waxaa Khamiistii shaaca ka qaaday Wasiirka Warfaafinta, Daud Aweys, isagoo ka hadlayay shir jaraa'id.

Wasiir Aweys ayaa sheegay in go'aankan uu ka dambeeyay digniin amni oo ka timid Dowladda Maraykanka, taasoo sheegtay in la filayo weerar argagixiso oo lagu soo qaadi karo goobaha muhiimka ah, oo ay ku jiraan garoonka diyaaradaha Aden Adde iyo dekadda Muqdisho.

“Amarkan waxaa loo soo saaray sidii loo xoojin lahaa ammaanka, waxaana looga hortagayaa khatar kasta oo soo wajahda garoonka, kaasoo muhiim u ah safarrada caalamiga ah iyo howlaha diblomaasiyadeed,” ayuu yiri Wasiir Duad Aweys.

Wasiir Aweys ayaa intaa ku daray in go'aankan uu yahay tallaabo lagu xaqiijinayo badbaadada rakaabka, shaqaalaha garoonka, iyo dhammaan dadka isticmaala goobta. Waxaa uu sheegay in dowladda ay si dhow ula shaqeynayso hay'adaha amniga si loo xakameeyo gelitaanka garoonka iyo agagaarkiisa.

Talaabada cusub ee amniga ayaa qayb ka ah qorsheyaal ballaaran oo ay dowladda Soomaaliya ku hirgelinayso si looga hortago hanjabaadaha amni ee kordhay. Hay'adaha amniga ayaa xoojiyay kormeerka aagagga muhiimka ah ee caasimadda, iyadoo ciidamadu ay feejignaan sare ku jiraan si looga hortago waxyeello kasta oo ka dhalata weerar kasta.

Safiirka Maraykanka ee Soomaaliya ayaa horey u soo saaray digniin ku socota shaqaalaha iyo muwaadiniinta Maraykanka ee ku sugan Soomaaliya, kuwaas oo lagu amray inay ka fogaadaan goobaha la isagu yimaado, gaar ahaan agagaarka xarumaha dowliga ah, garoomada diyaaradaha, iyo hoteellada, kuwaasoo loo arko inay yihiin bartilmaameedyo macquul ah.

Garoonka Diyaaradaha Aden Adde ayaa horey u soo gaaray weeraro argagixiso, taasoo ka dhigtay meel ay ciidanka aad uga taxadaraan ilaaladiisa, iyadoo la sameeyay tallaabooyin xooggan oo lagu sugayo ammaanka.

Si kastaba ha ahaatee, waxaa jira walaac ku saabsan in shaqsiyaad aan la oggolaanin oo hubeysan ay awoodaan inay galaan goobaha xasaasiga ah ee ku dhow garoonka, taasoo ah arrin dowladda Soomaaliya ay si weyn uga shaqeyneyso.

Dowladda Soomaaliya ayaa u xaqiijisay shacabka iyo beesha caalamka inay sii wadi doonto dadaallada lagu xoojinayo ammaanka iyo hubinta badbaadada dhammaan dadka ku sugan Muqdisho.

Khubaro amni ayaa sheegay in mamnuucidda ciidamo hubeysan iyo gaadiidka millatari inay galo agagaarka garoonka ay tahay tallaabo muhiim ah oo lagu xakameynayo gelitaanka aan la oggolaanin iyo yareynta halista ka dhalan karta weerarada argagixiso.

“Dowladda Soomaaliya waxay sii wadeysaa iskaashiga ay la leedahay la-hawlgalayaasheeda caalamiga ah iyo hay’adaha amniga si loo xalliyo caqabadaha amni ee jira loona hubiyo xasilloonida dalka,” ayuu yiri ilo amni oo lagu kalsoon yahay oo la hadlay Warbaahinta.

GAROWE ONLINE