DF oo Ka Shaqeyneysa Joojinta Xukuno Dil ah oo Lagu Riday Muwaadiniinta Soomaaliyeed

MUQDISHO, Soomaaliya - Dowladda Soomaaliya ayaa ka shaqeyneysa sidii loo joojin lahaa xukunada dilka ee lagu riday ku dhawaad 40 muwaadin Soomaaliyeed oo xabsi ku jira dalka Sacuudi Carabiya, si loo xaqiijiyo ilaalinta sharciga ee muwaadiniinta Soomaaliyeed ee ku sugan dibadda.

Wasiirka Cadaaladda Soomaaliya, Xasan Macallin, ayaa Khamiistii shalay shaaca ka qaaday inuu arrintan kala hadlay safiirka Sacuudi Carabiya u fadhiya Soomaaliya. Wadahadalada ayaa diiradda saaray sidii muwaadiniinta Soomaaliyeed ay u heli lahaayeen cadaalad, iyo sidoo kale sidii loo xoojin lahaa iskaashiga garsoorka ee labada dal.

"Waxaan la hadlay safiirka Sacuudi Carabiya joojinta dilalka ay ka fuliyaan dhalinyarada Soomaaliyeed, wuxuuna aqbalay codsigeenna. Sidoo kale, waxaan ka wadahadalnay sidii loo dhisi lahaa iskaashi garsoor oo labada dal dhex mara," ayuu yiri Wasiir Xasan Macallin.

Wasiirku wuxuu kaloo soo jeediyay heshiis isku beddelka maxaabiista ee Sacuudi Carabiya, taasoo ogolaaneysa in muwaadiniinta Soomaaliyeed ee xukunka lagu riday ay ciqaabtooda ku qaataan gudaha Soomaaliya.

"Waxaan ku dadaaleynaa sidii aan ugu soo celin lahayn muwaadiniinta Soomaaliyeed ee xukunka lagu riday ee xabsiyada Sacuudi Carabiya, si ay ciqaabtooda uga qaataan gudaha Soomaaliya. Waxaan soo gudbinnay heshiiska arrintan ku saabsan waxaana sugeynaa jawaabta Wasaaradda Cadaaladda Sacuudi Carabiya si loo dhameystiro heshiiska," ayuu hadalkiisa raaciyay.

Dadaalkan ayaa ka dambeeya dilkii muwaadin Soomaaliyeed Maxamed Nur Xuseen oo la toogtay bishii Febraayo 2025, kadib markii lagu helay dambiga ka ganacsiga daroogada. Waxa uu ku dhintay iyadoo la dhaqangelinayay xukunka dilka ee Sacuudi Carabiya, taasoo waafaqsan sharciga dilka ee dalkaas. Si kastaba ha ahaatee, qoyska Maxamed Nur Xuseen ayaa eedeyn u soo jeediyay ciidamada Sacuudi Carabiya, iyaga oo sheegay in aan la siinin maxkamad cadaalad ah, in aan loo oggolaan difaac sharciga, iyo in la diiday in uu racfaan ka qaato xukunka.

Kadib dilka Maxamed Nur Xuseen, ehellada muwaadiniinta kale ee xabsiga lagu hayo ee xukunka dilka lagu riday ayaa mudaharaad ka sameeyay Muqdisho, iyaga oo ka dalbanaya dowladda Soomaaliya inay faragelin ku sameyso si ay u difaacdo dadka ay qoyskoodu xukunka dilka ku saaran yihiin.

Wadahadalada dowladda Soomaaliya ee Sacuudi Carabiya ayaa ka danbeeya dadaal lagu doonayo in laga hortago dilalka dheeraadka ah iyo sidii loo heli lahaa qaab sharciyeed oo loo soo celiyo maxaabiista Soomaaliyeed ee xabsiyada Sacuudi Carabiya.

GAROWE ONLINE