Dowladda Soomaaliya oo Maamuli Doonta Howlgalka AUSSOM

MUQDISHO - Dowladda Soomaaliya ayaa shaacisay in ay maamuli doonto howlgalka Midowga Afrika ee taageerada iyo xasilinta Soomaaliya (AUSSOM), iyadoo ciidamada maxalliga ah ay isku diyaarinayaan in ay qaataan mas'uuliyadda amniga dalka. Tani ayaa timid kadib markii Midowga Afrika iyo Soomaaliya ay heshiis ka gaareen tirada ciidamada ka qeyb galaya howlgalka.

Hussein Moalim Mohamud, La-taliyaha Amniga Qaranka, ayaa sheegay in howlgalka AUSSOM ay tahay in Soomaaliya hogaamiso, taasoo ah isbeddel weyn marka loo eego sidii hore ee ciidamada ajaanibka ay si toos ah u maamulayeen howlgalka dalka.

Dalalka Masar, Itoobiya, Kenya, Uganda iyo Jabuuti ayaa ka qeyb qaadan doona howlgalka oo ka kooban 11,500 askari, halka Burundina ay kala baxayso askarteeda Soomaaliya kadib markii ay heshiis laga gaari waayay tirada ciidamada ka qeyb galaya howlgalka cusub.

Hussein Moalim ayaa sheegay in horumar weyn laga sameeyay sugida deegaanada muhiimka ah iyo ka saarista khataraha argagixisada. Sidoo kale, wuxuu xusay in Ciidamada Qalabka Sida ee Soomaaliya ay ku jiraan qorshe lagu siiyo qalab ciidan oo dhammeystiran, taasoo u suurtagelin doonta inay si buuxda u qaataan mas'uuliyadda amniga dalka mustaqbalka dhow.

Dowladda Federaalka Soomaaliya, oo kaashaneysa dalalka ka qeyb qaadanaya howlgalka AUSSOM iyo saaxiibada caalamiga ah, ayaa sii wadaysa dadaalada lagu xaqiijinayo amniga iyo in la ciribtiro dhammaan khataraha soo food saara madaxbannaanida iyo xasiloonida dalka, sida lagu sheegay warbixin ka soo baxay warbaahinta dowladda.

Talaadadii, Ciidamada Qalabka Sida ee Soomaaliya ayaa si dhow ula shaqeeyay Taliska Afrika ee Mareykanka (AFRICOM) si ay u fuliyaan howlgallo duqeyn ah oo lala eegtay Al-Shabaab kadib markii ay weerar ku qaadeen magaalada Alkowsar ee gobolka Shabeellaha Dhexe.

Duqeynta, sida ay saraakiil sheegeen, waxay bartilmaameedsatay hogaamiyayaasha Al-Shabaab kuwaas oo guuldarrooyin kala duwan ka soo gaarey dagaallo ay la galeen ciidamada Soomaaliya iyo maleeshiyo maxalli ah. Tirada khasaaraha lama soo sheegin, laakiin qiimeyn ayaa lagu sameynayaa.

Soomaaliya ayaa qorsheyneysa inay si buuxda u cirib tiriyaan Al-Shabaab iyo ISIS, kuwaas oo isku daya inay ridaan dowladda federaalka, iyadoo ciidamada ka tirsan Puntland ay la shaqeynayaan AFRICOM iyo Imaaraadka Carabta si ay u la dagaallamaan ISIS.

GAROWE ONLINE