Duqayn diyaaradeed oo lagu dilay xubno ka tirsan Al-Shabaab

JOWHAR, Soomaaliya - Ugu yaraan 50 dagaalyahan oo ka tirsan Al-Shabaab, oo ay ku jiraan hogaamiye sare, ayaa lagu dilay duqayn diyaaradeed oo ay fuliyeen ciidamada Soomaaliya iyagoo kaashanaya ciidamo caalami ah, waxaana duqayntu ka dhacday gobolka Shabeellaha Dhexe.

War-saxaafadeed kasoo baxay ciidamada Xoogga Dalka Soomaaliyeed oo la soo saaray Arbacada maanta ah, ayaa lagu xaqiijiyay in duqayntan ay ka dhacday deegaanada Damasha iyo Shabeelow, halkaasoo lagu beegsaday gaadiidka dagaalka Al-Shabaab.

War-saxaafadeedka waxa lagu sheegay in Mansoor Tima-Weeyne, hogaamiye sare oo ka tirsan Al-Shabaab, oo mas'uul ka ahaa diyaarinta iyo isticmaalka gaadiidka dagaalka ee weerarada, uu sidoo kale ku dhintay duqayntan. Tima-Weeyne ayaa dhawaan ka soo laabtay deeganka Bulo Fulay, wuxuuna waday gaadiid dagaal oo la soo hagaajiyay, kaasoo kooxda Al-Shabaab u isticmaashay weerarada.

Taliska Ciidamada Xoogga Dalka Soomaaliya ayaa sheegay in duqayntan ay si taxaddar leh u qorsheeyeen, iyadoo lagu bartilmaameedsaday xubno sare oo ka tirsan Al-Shabaab.

Waxa uu sheegay in hawlgalkan uu yahay guul weyn oo dharbaaxo ku ah awoodda dagaalka ee kooxda, islamarkaana uu qeyb ka yahay dadaallada socda ee lagu wiiqayo argagixisada gobolka.

GAROWE ONLINE