Fahfaahin: Diyaarad Kenya laga leeyahay oo ku dhacday nawaaxiga Muqdisho

MUQDISHO, Soomaaliya - Diyaarad lagu diiwaan geliyey Kenya ayaa ku dhacay ugu yaraan 24 kiilomitir oo koonfur-galbeed ka xigta magaalada Muqdisho, caasimadda Soomaaliya, sida ay sheegtay Hay'adda Duulista Civili ee Soomaaliya (SCAA), iyadoo ay tilmaantay in dhammaan xubnaha shaqaalaha ee saarnaa ay ku geeriyoodeen goobta dhacdada.

Diyaaradda xamuulka ayaa ka soo laabtay magaalada Dhobley ee gobolka Jubbada Hoose kadib markii ay gaarsiisay sahayda ciidamada Midowga Afrika, markaasoo ay dhacday Sabtidii, saacadu markay ahayd 5:43 galabnimo waqtiga maxalliga, sida ay sheegtay Hay'adda Duulista, iyada oo tacsi u dirtay qoysaska dadka ku geeriyooday.

Dhobley waa xarunta ciidamada taageerada iyo xasilloonida Midowga Afrika ee Soomaaliya (AUSSOM) ee ka socda Kenya, kuwaas oo ka hawlgala Aagga II ee dowlad-goboleedka Jubaland. Magacyada xubnaha shaqaalaha lama shaacin isla markiiba.

"Diyaaradda waxay ahayd DHC-5D Buffalo oo leh lambarka taxanaha 109 iyo diiwaangelinta 5Y-RBA," ayaa lagu sheegay qoraal ay soo saartay Hay'adda, saacado yar kadib markii la xaqiijiyey dhacdada. Waxay ku dhowayd inay ku degto Garoonka Caalamiga ah ee Aden Adde ee Muqdisho.

"Waxaa saarnaa shan qof, dhammaantood waxay ku geeriyoodeen shilka. Duulimaadku wuxuu ka soo baxay Dhobley, wuxuuna ku socday Garoonka Caalamiga ah ee Aden Adde ee Muqdisho," ayaa lagu sii sheegay warbixinta.

Iyada oo kooxaha duulista ay ku howlan yihiin helitaanka xog dheeraad ah, waxaa la xaqiijiyey in diyaaradda ka diiwaan gashan Kenya ay cilad ku timid kahor inta aysan kasoo duulin Dhoobley. Diyaaradda waxaa lahaa shirkadda Trident Aviation Limited.

Waddooyinka burbursan iyo amniga oo aan wanaagsanyn ayaa dadka badankood ka dhigaya in ay doorbidaan gaadiidka hawada oo ah mid degdeg ah, ammaan ah. Al-Shabaab ma laha awood ay ku soo rido diyaarad — ama ugu yaraan ma jirto wax caddeyn ah oo muujinaya in ay ku lug leeyihiin dhacdooyinkan.

GAROWE ONLINE