Farmaajo oo direy Tacsi aan looga baran

MUQDISHO, Soomaaliya - Madaxtooyada Soomaaliya ayaa usoo tacsiyeysay wiil dhalinyaro ah oo maanta ku geeriyooday isbitaalka Digfeer ee magaalada Muqdisho. Alle ha u naxariistee marxuumka ayaa lagu magacaabi jiray Ismaaciil Maxamuud Shidane asagoo caan ku ahaa taageeridda Nabad iyo Nolol.

Ismaaciil ayaa kamid ahaa dhalinyarada firfircoon ee ka soo laabatay dalka dibaddiisa, asagoo door weyn ka qaadan jiray wacyi galinta bulshada iyo hawlaha isxilqaanka ee dib loogu dhisayey dalka.

Ismaaciil ayaa la sheegay in uu u geeriyooday xanuunka macaanka.

Garoweonline ayaa ogaatay in marxuumka  uu ahaan jiray xoghaya madaxweynaha ka hor inta uusan xanuunsan

Xafiiska ugu sareeya dalka ee Villa Somalia ayaan looga baranin ay u tacsiyeeyaan dadka Soomaaliyeed ee eheladooda ugu dhintaan dalka siyaabo kala duwan.

Madaxweynaha Soomaaliya ayaan gabi ahaan tacsi u dirin Agaasimihii Idaacada Radio Muqdisho Cabdicasiis Maxamuud Guuleed 'Afrika' oo kooxaha Argagixisada ah horey ula  beegsadeen Qarax. 

Waxaa sidoo kale usoo tacsiyeeyay shaqsiyaad aad oogu dhaw Villa Somalia oo uu kamid yahay gudoomiyaha amniga ee gobolka Banadir, Cali Yare.

GAROWE ONLINE