Hargeysa: booliska Somaliland oo la wareegey idaacad yar
-
- Posted On 18-11-2014, 05:58AM
November 18, 2014 (GO)- Ciidamada booliska Somaliland ayaa xalay la wareegey Idaacad yar oo FM ah taasoo ka hadli jirtey magaalada Hargeysa ee xarunta maamulka Somaliland.
Idaacadda oo lagu magacaabo Baadi Goob inta badanna xilliga habeenka hawada soo geli jirtey islamarkaana baahin jirtey warar iyo warbixino liddi ku ah dowladda waxaa shantii bilood ee ugu dambeeyey ku raad joogey booliska.
Taliyaha Booliska Somaliland Sareeyo Guuto Cabdulaahi Fadal Iimaan oo warbaahinta la hadlay ayaa sheegay in xalay abbaare 9:30 fiidnimo hawlgal boolisku ka sameeyeen xaafadda Oktoobar idaacaddaas kusoo qabteen.
Taliye Fadal wuxuu intaas raaciyey in ciidamadu sidoo kale hawlgalkaas kusoo qabteen afar nin oo dhallinyaro ah oo qaarkood gacanta lagu dhigay iyagoo hawsha idaacadda ku gudo jira dhowaanna maxkamad lasoo taagi doono.
Radio Baadi Goob oo loo badinayo inay furteen qaar kamid ah siyaasiyiinta mucaaradku waa idaacad yar oo guurguurta taasoo sanadkan horraantiisii Hargeysa laga furay dowladuna in mudo ah ku howlaneyd sidii loo xiri lahaa.
Sharciga Somaliland ayaa mamnuucaya in la furto idaacado madax banaan arintaasoo hay'adaha xoriyatul qawlka iyo xuquuqda saxaafadda u ololeeyaa walaac ka muujiyeen.
GAROWE ONLINE
