Haweenka Jubaland oo codsaday in laga qayb geliyo Baarlamaanka
-
- Posted On 01-10-2014, 11:00AM
October 1, 2014 (GO)- Xili magaalada Kismaayo ee xarunta maamulka Jubbaland uu ka soconayo shirka dib u heshiisiinta dadka dega gobolada Jubbooyinka iyo Gedo ayaa maanta waxaa hoolka shirku uu ka socdo ee Caymiska ku kulmay ururuda haweenka gobolada Gedo iyo Jubbooyinka.
Wakiilo ka socday Dowlada Federaalka, IGAD iyo AMISOM ayaa madasha ku sugnaa, waxana sidoo kale halkaa hadal dheer ka jeedisay wasiirada arrimaha haweenka iyo qoyska Marwo Qamar Deeq ayadoo dumarka ugu baaqday in ay xoojiyaan dadaalladooda ku aadan nabadeynta.
Qaar kamid ah dumarka goobta ka hadlay ayaa maamulka ugu baaqay in laga siiyo xubno muhiim ah baarlammaanka Jubbaland oo hadda soo xulidiisu gebo gebo ku dhowdahay.
Dhamaan mas'uuliyiintii goobta ka hadlay ayaa dumarka ugu hambalyeeyey dadaalada nabada ee ay wadaan waxayna ugu baaqeen inay sii wadaan dadaaladooda ku aadan dib heshiisiinta iyo barbaarinta jiilasha cusub.
Waa markii u horeysay oo tiro dumar ah oo intaan la'eg magaalada Kismaayo ku kulmaan tan iyo markii la dhisay maamulka Jubbaland.
GAROWE ONLINE
