Heshiis laga gaarey in mooshinka la horkeeno Barlamanka Somalia
-
- Posted On 29-11-2014, 11:35AM
Nov 29, 2014 [GO]-Kadib markii kulamo dhexmareen Madaxweynaha dowlada Federaalka, Xildhibnaada diidan iyo kuwa ogol mooshinka, Ra'isla wasaaraha Cabdiweli Shiikh iyo gudoonka Barlamanka Somalia 24-kii saac ee lasoo dhaafey ayaa wararka Garowe online ka helyso xubno aad ugu dhowaa kulamadaas sheegayaan in heshiis la gaarey.
Kulamadaan ayaa waxaa lagu saarey guddi ka kooban 5 Xildhibaan oo ka tirsan dhinacyadii isku hayey mooshinka kuwasoo u kala dabqaadayey Ra'isal wasaaraha Somalia iyo Madaxweyne Xasan Shiikh.
Wararka ku dhow wadaxaajoodkaan ayaa sheegaya in Madaxweynaha dowlada Federaalka iyo xulafadiisa siyaasadeed ku adkeysteen in mooshinka la horkeeno Barlamanka islamarkaana uu qaato fursadiisa taasoo Ra'isal wasaare Cabdiweli Shiikh ogolaadey.
"Waxaa muuqan waydey sabab loogu jiro buuqa ka taagan Barlamanka kaasoo sababi kara in bur-bur ku yimaado hay'adaan sharci dajinta, sidaas-na waxaa garowshiiyo ka baxshey xildhibanaada diidan mooshinka iyo Ra'isal wasaare Cabdiweli Shiikh". sidaas waxaa GO u sheegey Xildhibaan diiday in aan xusno magaciisa.
Heshiiska la gaarey ayaa dhinaca kale dhigaya in mooshinka dib loo qaybiyo mar kale Dec 2,2014 oo ku beegan maalinta Talaadada marka kulankaan furmo taasoo fursad siineynsaa iney helaan waraaqahaan Xildhibaanada diidan barnaamijka xil-ka qaadista Ra'isal wasaaraha.
Magaalada Muqdishu ayaa laga dareemayaa dhaqdhaqaaq xoogan oo lagu kala xod-xodanayo Xildhibaanada Barlamanka kuwasoo kulamo kala duwan la qaadanaya Madaxweynaha dowlada Federaalka ah iyo Ra'isal wasaaraha.
Beesha caalamka ayaa sidoo kale qayb libaax ka qaadatey in heshiiskaan la garao madaama ay cabsi ka qabeen hadii murankaan sii socda bur-bur ku yimaado Barlamanka Federaalka ah.
Gudoomiyaha Barlamanka Federaalka ayaa horey u sheegey in mooshinka laga doodi doono marka heshiis laga gaaro khilaafka u dhexeeya dhinacyada ku muransan siyaasada Villa Somalia.
GAROWEONLINE
