Jubaland: Xisbiga Xasan Sheekh wuxuu Khatar Gelinayaa Midnimada iyo Dowladnimada Soomaaliya

KISMAYO, Soomaaliya - Jubaland ayaa si kulul uga jawaabtay dhacdooyinka cusub ee ka dhacay magaalada Muqdisho ee ku saabsan magacaabista xisbi cusub, taas oo ay ku tilmaantay tallaabo aan waafaqsaneyn dastuurka dalka.

Jubaland waxay muujisay in hawlgalkan uu caddeyn u yahay dhibaatada hogaamineed ee Madaxweynaha Xasan Sheekh Maxamuud, iyadoo xilligan dalka uu wajahayo khatar amni oo ba'an, waxaana ay tilmaantay in qorshahan uu dalka ku sii wadi doono xaalad xukun kalitalis ah iyo xisbiyo aan awood lahayn.

Madaxtooyada Jubaland ayaa si cad uga digay in tallaabadan cusub ay dhaawacdo isku xirnaanta iyo midnimada dalka, iyada oo sheegay in doorashada iyo hawlgallada Baarlamaanka Soomaaliya ay noqdeen kuwo aan wax saamayn ah ku yeelanayn ilaalinta iyo dhaqangelinta Dastuurka.

Jubaland waxay sidoo kale tilmaantay in dhamaantii awoodihii Baarlamaanka loo maroorsaday, taasoo keentay in uu fadhiyo awood la’aan oo aan si dhab ah u qaban karin waajibaadkooda.

Sidoo kale, Dowlad Goboleedka Jubaland ayaa ugu baaqday shacabka Soomaaliyeed, siyaasiyiinta, iyo qeybaha kala duwan ee bulshada inay iskaashadaan si loo ilaaliyo dowladnimada Soomaaliya iyo nabadgelyada dalka.

Waxay sidoo kale ugu baaqday beesha caalamka iyo saaxiibada caalamiga ah inay si dhab ah u taageeraan shacabka Soomaaliyeed, iyadoo xustay in aysan jirin wax ka muhiimsan sidii loo difaaci lahaa dowladnimada dalka.

Jubaland waxay hoosta ka xariiqday in waqtigan uu yahay mid aad u adag, isla markaana shacabka Soomaaliyeed ay ugu baahan yihiin taageero si loo waafajiyo himilooyinka iyo mustaqbalka dalka.

GAROWE ONLINE