Khilaafka Hanti dhowraha iyo Maxkamada Gobolka Banaadir soo meel sare gaarey

MUQDISHO, Soomaaliya - Hanti-dhowrka qaranka Axmed Ciise Guutaal, ayaa ku eedeeyay Maxkamadda gobolka Banaadir inay is-hortaag ku sameysay baaritaanka kiiska Musuq-maasuq  ah oo xafiiskiisa baaritaan ku hayay.

Wararka ayaa sheegaya in Maxkamadda ay soo saartay xukun dhul Muqdisho ku yaalla iyo kuwa xukuno arrimo dhaqaale laga gaarey kadibna uu Hanti-dhowrka joojiyay xukunkaas fulintiisa. Arintan ayaa la sheegay inay kicisay khilaafka labada dhinaca, oo gaarsiisay heer Madaxda sare ee dalka soo farageliyaan.

Axmed Ciise Guutaale, oo wariye hore ah oo aan wax khibrad ah u lahayn howsha xafiiska Hanti-dhowrka ayaa looga yeeray Maxkamadda Gobolka Banaadir inuu kasoo muuqdo 16-ka bishan, iyadoo yeeritaankiisa loo cuskadey qodobada  254, 257, iyo 267 ee Somali Penal Code. Waxaa lagu eedeeyay isku day inuu faragelin ku sameeyo arrimaha garsoorka dalka.

Waxay sidoo kale Maxkamadda ku eedeysay Axmed Ciise Guutaale inuu joojiyay lacagaha qoondada ah ee ay ku shaqeeyaan Maxkamadaha, si uu ugu cadaadiyo inay u hogaansamaan amarkiisa. Hadii uu diido inuu Maxkamadda tago, waxaa ka dhalan kara ciqaab sharciga dalka waafaqsan, sida ku xusan qoraal Maxkamadda kasoo baxay.

Maxkamadda ayaa sheegtay in Guutaal uu faraha la galay arin ka baxsan shaqada xafiiskiisa iyo waajibaadka loo magacaabey.

Doodan ayaa banaanka soo dhigtay in nidaamka sharciga dalka aysan ka jirin hufnaan iyo isla-xisaabtan, iyadoo dowladda uu hogaamiyo Xasan Sheekh dadka xafiiska ku keento qaraabo-nimo, saaxiibtinimo iyo dan-wadaag siyaasadeed, waxayna dhalisay taasi inay meesha ka baxdo hanaankii dowladnimada Soomaaliya.

Warbixin ay soo saartay hay'adda Transparency International 2024 ayaa Soomaaliya ku dartay liiska dalalka ugu musuq-maasuqa badan, taasoo muujinaysa guul-darrooyin maamul oo qotodheer, hay'adaha dowliga oo daciifka ah, iyo la'aanta qorshe lagu xallinayo musuqmaasuqa dalka la degay.

Akhri Xafiiska Hanti dhowraha Guud ee Qaranka oo u jawaabay Maxkamada gobolka Banaadir:

GAROWE ONLINE