Laftagareen oo Ka Qayb Galay Xuska 129-aad ee Guushii Itoobiya ka gaartay dagaalkii Adwa

BAYDHABO, Soomaaliya - Madaxweynaha Dowlad Goboleedka Koonfur-Galbeed Soomaaliya, Laftagareen, ayaa ka qayb galay xus lagu qabtay magaalada Baydhabo, kaasoo lagu maamuusayey sanadguuradii 129-aad ee guushii taariikhiga ahayd ee Itoobiya ka gaartay dagaalkii Adwa, oo isaga caabisay gumeysigii Talyaaniga.

Itoobiya ayaa noqotay dalkii ugu horeeyay Afrika ku yaalla oo iska caabiyay gumeysi, waxaana guusha Adwa loogu yeeraa "Guusha Afrika" waxaana diiradda lagu saaray guushii Ciidamada Itoobiya ee ka adkaatay ciidamada Talyaaniga dagaalkii dhacay 1-dii Maarso 1896.

Madaxweyne Laftagareen ayaa ka hadlay muhiimadda xuska iyo in guushaas ay muujineyso midnimada iyo awoodda Afrika, isagoo tilmaamay in guulaha sida Adwa ay dhiirrigelin u yihiin dadka Afrikaanka ah ee doonaya inay ka hor yimaadaan cadaadiska dibadda.

Wuxuu sidoo kale xusay in xuska noocan ah uu muhiim u yahay kor u qaadista isbeddelka siyaasadeed iyo dhaqaalaha ee qaaradda Afrika.

Xuska 129-aad ee Guushii Adwa ayaa ahaa mid si weyn loo xusay, iyadoo ay ka qayb galeen mas'uuliyiin ka kala socday dowlada iyo bulshada rayidka ah, waxaana sidoo kale lagu muujiyey qiimaha taariikhiga ah ee dhacdadan.

Dagaalkii Adwa wuxuu ahaa mid go'aan weyn ka gaaray xilligii gumeysiga ee Afrika, isagoo caddeeyay awoodda iyo isu-taga dadka Afrikaanka ah, gaar ahaan Itoobiya, oo ka hor tagtay gumeysiga Talyaaniga.

GAROWE ONLINE