Madaxweynaha M. Koonfur Galbeed oo wasiirro soo magacaabay
-
- Posted On 19-12-2014, 10:19AM
December 19, 2014 (GO)- Madaxweynaha maamulka koonfur galbeed Shariif Xasan Sheekh Aadan ayaa soo magacaabay qaar kamid ah xubnaha golihiisa wasiirrada.
Munaasabad ka dhacday Baydhabo ayuu kaga dhawaaqay magacyada afar wasiir isagoo sheegay inuu inta dhimanna sida ugu dhaqsaha badan kusoo dhameystiri doono.
Madaxweyne Shariif ayaa dhanka kale sheegay in xubnahan keligiis iska soo magacaabin balse uu kala tashaday qaybaha kala duwan ee bulshada.
Afarta wasaaradood ee wasiirrada loo soo magacaabay ayaa kala ah:
- Wasaarada Arrimaha Gudaha, C/raxmaan Ibraahim Aadan (Sate).
- Wasaarada Maaliyadda, Sheekh Xasan Ibraahim (Lug-buur).
- Wasaarada Garsoorka, Axmed Sheekh Xasan (Garrow).
- Wasaarada Beeraha, Maxamed Xasan Fiqi.
Shariif Xasan Sheekh Aadan waxaa madaxweynaha maamulka Koonfur Galbeed loogu doortey doorasho ka dhacday magaalada Baydhabo November 17, 2014.
GAROWE ONLINE
