Muqdisho: badmaaxiin ku afduubnaa gobolada dhexe oo lasii daayey
-
- Posted On 30-10-2014, 09:18AM
October 30, 2014 (GO)- La-haystayaal u dhashay dalka India oo muddo afar sano ah afduub loogu haystey deegaano ka tirsan gobolada dhexe ayaa dib xoriyadooda u helay shalay oo Talaado ahayd.
La haystayaasha oo tiradoodu todoba qof tahay dhammaantoodna badmaaxiin ahaa waxaa maanta lasoo gaarsiiyey magaalada Muqdisho kadib markii ay goor hore oo saaka ah kasoo duleen degmada Dhuuso Mareeb ee gobolka Galguduud.
Mas'uuliyiin ka tirsan Dowlada Federaalka ayaa sheegay in diyaaradda dadkaas soo qaaday magaalada Muqdisho laga diray islamarkaana sida ugu dhaqsaha badan loogu dhoofin doono dalkooda hooyo.
Sii deynta badmaaxiinta Hindida ah waxaa kaalin weyn ka qaatay odayaasha iyo waxgaradka gobolka Galguduud, lamana oga ilaa iyo hada in kooxdii burcad-badeedka ahayd ee dadkaasi u qafaalnaayeen la siiyey madax furasho iyo in kale.
Weeraradii burcad-badeedka Soomaalidu ku qaadi jireen maraakiibta maraya Gacanka Cadmeed iyo Badweynta Hindiya ayaa si aad ah hoos ugu dhacay labadii sano ee ugu dambeeyey.
GAROWE ONLINE
