Safiir Hore oo Mareykan ah: Soomaaliya Waxaa Hortaagan Qabyaalad iyo Khilaaf Siyaasadeed

WASHINGTON - Larry Andre, oo horey u ahaa safiirka Mareykanka ee Soomaaliya, ayaa si cad u muujiyay walaaca uu ka qabo jihada ay u socoto Soomaaliya, isagoo si gaar ah u tilmaamay in khilaafaadka siyaasadeed iyo qabyaaladda sii daba-dheeraatay ay caqabad ku yihiin nabadda iyo dowladnimada dalka.

Wareysi uu dhawaan siiyay wargeyska The Washington Post, Andre wuxuu ku sifeeyay xaaladda siyaasadeed ee Soomaaliya mid jilicsan, isagana sheegay in dhacdooyinkii doorashooyinka 2022 ay muujinayeen sida ay u adagtahay in la helo hannaan siyaasadeed oo deggan. Sida uu hadalka u dhigay, rabshadahaasi waxay calaamad u ahaayeen khataro la dareemayo oo dhaawici kara dadaallada nabad-dhisidda.

“Soomaaliya waxay weli la tacaaleysaa saameynta qotoda dheer ee kala qeybsanaanta ku dhisan qabaa’ilka, taasoo si gaar ah u carqaladeynaysa dadaallada lagu dhisayo dowlad loo dhan yahay,” ayuu yiri Andre.

Sidoo kale, wuxuu tilmaamay in Madaxweynaha hadda talada haya, Xasan Sheekh Maxamuud, uu si aad ah ugu mashquulsan yahay siyaasadda gudaha, taas oo hoos u dhigtay feejignaanta loo baahan yahay si wax looga qabto qatarta Al-Shabaab iyo arrimaha amniga guud ahaan.

Digniinta Andre ayaa ku soo beegmeysa xilli ay Soomaaliya wajahayso marxalad kala guur ah, doorashooyin soo socda iyo xaalad amni oo wali aad u liidata. Beesha caalamka, gaar ahaan Mareykanka oo xulufo dhow la ah Soomaaliya, waxay si gaar ah isha ugu heyso xaaladda, iyadoo walaac ka muujineysa jihada ay wax u socdaan.

GAROWE ONLINE