Somaliland Oo Beenisay In Aqoonsi Ku bedelanayso qaabilaadda Falastiiniyiinta

HARGEYSA, Soomaaliya - Somaliland ayaa beenisay wararka sheegaya inay raadinayso aqoonsi diblomaasiyadeed ka kala yimid Mareykanka iyo Israa'iil, iyadoo ku tilmaantay warbixinta ka soo baxday idaacadda dadweynaha Israa'iil, KAN, mid aan sax ahayn oo marin habaabin ah.

Wasiirka Arrimaha Dibadda Somaliland, Abdirahman Dahir Adan, ayaa dhaleeceeyay warbixintaas, isagoo sheegay in waraysigiisii dhowaan la qaaday ee idaacadda KAN ee Israa’iil uu si khaldan u turjumeen. Waraysigaas, waxaa lagu weydiiyay qorshaha Donald Trump ee ku saabsanaa sidii dadka ka barakacay Gaza loo dejin lahaa Somaliland, mawduuc muran iyo dood caalami ah ka abuuray.

"Somaliland wax wadahadal ah ama heshiis ah oo ku saabsan Falastiiniyiinta kama aysan qeybgalin. Himilada Somaliland ee aqoonsi waxay ku saleysan tahay taariikhdeeda gaarka ah, dimuqraadiyadeeda, iyo tobannaan sano oo is-maamul ah," ayuu Adan ku yiri qoraal uu ku baahiyay X.

Adan ayaa sidoo kale beeniyay warbixinta Al Jazeera, isagoo ku eedeeyay shabakadda inay si khaldan u turjumeen hadalladiisa. "Maya, warbixinta Al Jazeera ee dhowaan soo baxday waa mid aan sal iyo raadka lahayn, waxayna khalad ku turjumaysaa mowqifka cad ee Somaliland ee ku aaddan xiriirka diblomaasiyadeed," ayuu intaa ku daray.

Waraysigaasi waxaa sidoo kale la sheegay in Adan uu sheegay in Somaliland ay "furan tahay in ay wax ka wada hadasho," balse kaliya dowladaha aqoonsan sharciga iyo jiritaanka Somaliland, isagoo uga jawaabaya su'aal ku saabsan warbixin sheegaysa in lagu heshiiyey in dadka Gaza laga dejiyo Somaliland.

Warbixinta KAN ayaa dhalisay cambaareyn ballaaran oo ka timid dadka Somaliland ee ku jira baraha bulshada, kuwaasoo ku eedeeyay idaacadda inay si khaldan u soo tabisay hadalka Wasiir Adan. Qaar ka mid ah isticmaalayaasha X (hore Twitter) ayaa ku boorriyay wasiirka inuu si rasmi ah uga fogaado maqaalkaas, iyagoo sheegay inuu khaldin karo mowqifka Somaliland ee ku saabsan siyaasadda diblomaasiyadeed ee muddo dheer.

Qoraal dheeri ah oo kasoo baxay Adan ayaa caddeeyay inaysan jirin dowlad la soo xiriirtay Somaliland si looga wada hadlo qaxootiga Gaza. Hadalladiisa waxaa markaas ka dib turjumay oo faafiyay The Jerusalem Post.

Somaliland, ayaa raadineysa aqoonsi caalami ah tan iyo markii ay sheegtay inay ka go'day Soomaaliya 1991. Waxay xiriir aan rasmi ahayn la leedahay dhowr dal, laakiin weli ma aysan helin aqoonsi rasmi ah oo ka dhigan dawlad madax-bannaan.

GAROWE ONLINE