Soomaaliya iyo Itoobiya oo soo afmeeray khilaafkii ka dhaxeeyay

Booqashadan wafdiga Itoobiyaanka ayaa noqonaysa tii ugu horaysay ee wasiiro ka socda Itoobiya.

MUQDISHO, Soomaaliya - Wasiirka Arrimaha Dibadda Somaliya, Axmed Macalin Fiqi, ayaa Khamiistii shaaca ka qaaday in Soomaaliya iyo Itoobiya ay gadaal ka dhigeen khilaafkii diblomaasiyadeed ee u dhaxeeyay.

Isagoo shir jaraa’id ku qabtay Muqdisho, kaddib kulamo uu la qaatay wasiirka gaashaandhigga Itoobiya Caasha Maxamed iyo wasiiru-dowlaha arrimaha dibadda Mesganu Arga, ayuu Fiqi ku dhawaaqay inuu dhammaaday khilaafkii dublamaasiyadeed ee daba-dheeraaday.

“Arrimihii aan kala kulanay Itoobiya waxaa lagu xaliyay samir ay Soomaaliya yeelato oo ay ku kalsoon tahay howshaas, inkastoo Itoobiya ay horay u qabsatay dhulkeenna,” ayuu yiri.

Booqashadan wafdiga Itoobiyaanka ayaa noqonaysa tii ugu horaysay ee wasiiro ka socda Itoobiya ay ku yimaadaan Muqdisho tan iyo markii uu bilaabmay khilaafka dublamaasiyadeed kadib markii Itoobiya ay bishii January 2024 heshiis la gashay maamulka Somaliland ka goostay, waxaanay u ogolaatay inay hesho badda iyo saldhiga badda si ay u aqoonsato madax-banaanida Somaliland.

GAROWE ONLINE