Soomaaliya: Xamse Cabdi Barre oo eedeeyay Xukuumaddiisa

MUQDISHO, Soomaaliya - Khudbad si weyn looga hadal hayo gudaha Soomaaliya iyo caalamkaba, ayuu jeediyay Ra’iisul Wasaaraha Soomaaliya, Xamse Cabdi Barre khamiistii taasoo ku eedeeyay xukuumaddiisa musuqmaasuq, hufnaan la’aan, iyo adeegyo dadweyne oo ka maqan dalka.

Ra’iisul Wasaaraha ayaa si cad u sheegay in dowladda hadda jirta aysan u adeegayn shacabka, isagoo yiri: "Waxaa jira musuqmaasuq, hufnaan la’aan, adeegyo dadweyne oo aan jirin, dowladduna waxay ku tiirsan tahay ilaalinta dalal shisheeye."

Hadalka Ra’iisul Wasaaraha ayaa si weyn uga yaabiyay shacabka Soomaaliyeed, iyadoo dad badani u arkeen tallaabo aan caadi ahayn oo xukuumad sare ka mid ah si furan u dhaliisho nidaamka ay hoggaanka u hayso.

Tallaabadan ayaa dhalisay su’aalo ku saabsan in Ra’iisul Wasaaruhu doonayo isbeddel dhab ah iyo in uu u diyaar garoobayo inuu ka hor yimaado hoggaanka sare ee dowladda si uu u sameeyo dib-u-habeyn siyaasadeed oo qoto dheer.

Waxaa la sugayaa jawaabta ay ka bixin doonto Villa Soomaaliya iyo saameynta ay hadalkan ku yeelan karto arrimaha gudaha ee Soomaaliya.

GAROWE ONLINE