Weriye xalay magaalada Muqdisho lagu dhaawacay
-
- Posted On 10-11-2014, 04:28AM
November 10, 2014 (GO)- Dhaawac culus ayaa soo gaarey mid kamid ah weriyaasha ka hawlgala magaalada Muqdisho, kadib markii ay xalay ku qaraxday miino loogu xiray gaarigiisa xilli uu marayey isgoyska km4.
Weriyaha oo lagu magacaabo Nuur Maxamed Cali oo horay uga soo shaqeeyey Radio Kulmiye hadase ka hawlgala hay'ad ka shaqeysa arimaha samafalka wuxuu si xun uga dhaawacmay qaybta hoose ee jirka gaar ahaan lugaha.
Dhaawiciisa waxaa la geeyey isbitaalka Madiina halkaasoo xiligan lagu dabiibay iyadoo wararkii ugu dambeeyey sheegayaan in xaaladiisu degen tahay.
Ma ahan markii ugu horeysey ee gaarigiisa qarax loogu xiro mid kamid ah weriyaasha ka hawlgala magaalada Muqdisho, haseyeeshee bilo kahor waxaa qarax noocan oo kale ahaa lagu diley weiye lagu magacaabi jirey Yuusuf Keynaan.
Ciidamada nabad-sugidda ee Dowlada Federaalka ayaa dhowaan la wareegey labo garaash oo la sheegay in lagu diyaarin jirey gawaarida Al-shabaab u adeegsadaan qaraxyada magaalada Muqdisho ka fuliyaan.
GAROWE ONLINE
