Xasan Sheekh oo dib ugu laabtay Muqdisho kadib weerarkii Masaajid Cali Gaduud

MUQDISHO, Soomaaliya - Madaxweynaha Soomaaliya, Xasan Sheekh Maxamuud, ayaa maanta ku soo laabtay Muqdisho ka dib markii Al-Shabaab ay qabsatay degmada Masaajid Cali Gaduud, oo 40-KM dhanka Koonfur uga beegan degmada Cadale oo isaga ku sugnaa.

Ilo xog-ogaal ah ayaa sheegay in madaxweynuhu uu soo gaabiyey booqashadiisa Cadale sababo la xiriira xaaladda amni ee sii xumaanaysa.

Xaaladda amni ee gobolka Shabeellaha Dhexe, oo xuduud la leh caasimadda Muqdisho, ayaa weli kacsan, iyadoo kooxda Al-Shabaab ay sii wadaan weerarada ay ku beegsanayaan goobaha ay dowladda maamusho ee ku dhaw Muqdisho.

Weerarrada Al-Shabaab ayaa si weyn u kordhay, iyadoo ay ku dhaceen deegaanno dhowr ah oo ku yaal nawaaxiga Muqdisho, sida degmada Afgooye iyo gobolka Shabeellaha Dhexe. Kooxda ayaa si joogto ah u adeegsanaya qaraxyada iyo weerarada tooska ah, iyagoo beegsanaya ciidamada dowladda iyo goobo muhim ah.

Sidoo kale, deegaanka iyo degmada Marka ee gobolka Shabeellaha Hoose ayaa ah goobaha ay Al-Shabaab si xowli ah ugu faafayaan, iyagoo dhowaan weeraray wadooyin muhiim ah iyo xerooyin ciidamada amniga. Weerarradaasi ayaa abuurtay xaalad aad u kacsan oo amni darro ah, taasoo sidoo kale saameyn ku yeelatay dhaqdhaqaaqyada dadka rayidka ah.

Go'aanka Madaxweynaha ee soo gaabinta safarkiisa Cadale ayaa ka tarjumaya sida khatarta amni ee ka taagan gobolka ay ugu baahan tahay in si degdeg ah looga jawaabo. Madaxweynaha ayaa sidoo kale lagu wadaa inuu ka hadlo xaaladda amni ee dalka iyo tallaabooyinka xiga ee looga hortagi karo kooxaha argagixisada, gaar ahaan Al-Shabaab, oo sii wadaya weerarrada iyo fidinta argagixisada ee ka socda gobollada dalka.

GAROWE ONLINE