Xasan Sheekh oo guddoomay fariin uga timid madaxweynaha Itoobiya

Dhambaalkan waxaa soo gaarsiiyey safiirka Cusub ee Dowladda Itoobiya ay u soo magacaabatay Soomaaliya Muktar Mohamed Ware.

MUQDISHO, Soomaaliya - Madaxweyne Xasan Sheekh Maxamuud ayaa warqadaha aqoonsiga danjirenimo ka guddoomay Safiirka Cusub ee Dowladda Itoobiya ay u soo magacaabatay Soomaaliya Muktar Mohamed Ware.

Danjiraha cusub ayaa waxa uu "Madaxweynaha Jamhuuriyadda la wadaagay dhambaal iyo salaan uu uga siday Madaxweynaha dalka Itoobiya Marwo Sahle-Work Zewde".

Ware ayaa Xasan Sheekh uga mahadceliyey soo dhoweynta diirran ee uu kala kulmay dowladda Soomaaliyeed, isaga oo soo bandhigay dadaalka uu ku bixin doono xoojinta xiriirka iyo wax wada qabsiga ku qotoma danaha qaran ee labada dowladood.

Sidda ay shaacisay Madaxtooyadda Soomaaliya, Xasan Sheekh Maxamuud ayaa ugu hambalyeeyey Muktar Mohamed Ware xilka safiirnimo, isaga oo la wadaagay in Dowladda Federaalka Soomaaliya ay ku garab istaagayso gudashada waajibka diblomaasiyadeed ee loo igmaday.

GAROWE ONLINE