Xukuumadda oo caddeysay mowqifkeeda wadahadalka Somaliland

Ra’iisul Wasaare Ku Xigeenka Xukuumadda Federaalka Soomaaliya Saalax Jaamac ayaa ka hadlay qadiyaddan.

MUQDISHO, Soomaaliya - Ra’iisul Wasaare Ku Xigeenka Xukuumadda Federaalka Soomaaliya Saalax Jaamac iyo Guddoomiyaha Aqalka Sare Cabdi Xaashi Cabdilaahi ayaa xalay ka qayb galay munaasibad afur ah.

Kulankaas ayaa Xildhibaannada Iyo Wasiirrada ka soo jeeda Gobollada Waqooyi la yeesheen Ergayga u qaabilsan wadahadallada Somaliland Dowladda Federaalka, Cabdikariin Xuseen Guuleed.

Saalax ayaa tilmaamay in arinta wadahadalada Somaliland tahay mid u baahan in xal waara laga gaaro isla markaana hoos loo eego tabashooyinka, si loo gaaro xal waara.

Ka gun-gaarida qadiyadan ayuu xusay in ay xaqiijineyso "qorshaha Xukuumadda DanQaran ee Soomaali Heshiis ah, kaas oo ay udub dhexaad u tahay ka miro dhalinta midnimadda iyo wada jirka Ummada Soomaaliyeed".

Guddoomiyaha Aqalka Sare, Cabdi Xaashi Cabdilaahi oo goobta ka hadlay ayaa dhinaciisa soo dhaweeyey Ergayga wadahalada arrimaha maamulka gooni-isu-taagga ah ee Somaliland.

Xaashi ayaa tilmaamay in ay kala shaqayn doonaan sidii xal waara looga gaari lahaa arrinta Somaliland, iyadoo loo marayo is qancin iyo garawshiyo si loo xaqiijiyo midnimadda dalka.

Dhankiisa, Cabdikariin Xuseen Guuleed ayaa sheegay "in arrinta Somaliland tabanayso ay tahay in si walaalnimo ku jirto looga wada hadlo, si loo gaaro natiijo wanaagsan oo saldhig u noqota midnimadda Umadda Soomaaliyeed".

GAROWE ONLINE