Maamulka Somaliland oo loo fasaxay dhoofka Xoolaha
-
- Posted On 24-07-2017, 11:57AM
HARGAYSA, Somaliland- Maamulka Somaliland ayaa shaaciyey in loo fasaxay dhoofka Xoolaha nool ee ay iib-gayn jireen dalka Boqortooyada Sucuudiga, taasoo muddo ay saarnayd Xayiraad saamaysay guud ahaan dalka Somalia.
Wasiirka xanaanada xoolaha Somaliland Cabdullaahi Maxamed Cukuse oo warkan Hargaysa kaga dhawaaqay ayaa sheegay in Carafada soo socota oo muddo yar ka harsantahay ay bilaamayso dhoofinta Xooluhu.
“Waxaan doonaya in ummadda aan ugu bishaareeyo in la inoo furay iibka ama dhoofkii Xoolaha oo muddo inaga xayirnaa ,dadaal badan iyo baryada ilaahay oo la inaga aqbalay ka dib dalka Sucuudi Carabiya waxay noo ogoladen Mosinka xajka Xoolihii noolaa ee awalba aynu u dhoofin jirnay inan u dirno,”Ayuu yiri Cakuse wariyeyasha la hadlayey.
Cukuse ayaa intaas ku daray in wafdi uu hogaaminay Madaxweynaha Somaliland uu u tagay waddanka Boqortooyada Sucuudiga sidii xal looga gaari lahaa arrintan keentay in la hakiyo dhoofka xoolaha.
Arrintan ayaa soo baxday maalin kadib markii dowladda Somalia shaaca ka qaaday in Sucuudigu fasaxay dhoofka xoolaha, waxaana wasiirka Xannaanada Xoolaha oo Muqdishu kula hadlayay warbaahinta uu xusay in sannadkan la dhoofin doono in kabadan 1 Milyan oo Ari ah.
Dhoofka Xoolaha ee Sucuudiga iyo Somalia oo 40 sanno ka badan soo socday ayaa ka mid ah kaabayaasha dhaqaalaha ee lafdhabrta u ah ganacsiga iyo dhaqaalaha waddanka kasoo kabanaya bur-burka iyo colaadaha Sokeeye, waxaana sanadihii u danbeeyey dhawr jeer ku yimid hakad dowladaasi sabab uga dhigto kalsooni darro ku aadan caafimadka iyo tayada maxjarada lagu hubiyo.
Maamulka Somaliland oo iskiis madax-banaani ugu dhawaaqay welina aan helin aqoonsi caalamiya ayaa u muuqda inuu ka intifaacsanayo go’aankii u kula saftay dowladaha Sucuudga,Imaraadka,Baxarayn iyo Masar oo xiriirka u jaray Qadar.
DF oo ay ka tirsan yihiin maamullada kele Somalia ayaa mawqif dhex-dhexaada ka istaagtay khilaafkan tasoo loo fasiray mid u xaglinaysa dhanka dowladda Qadar oo iskaashi la xusi karo aan la lahayn Somalia marka loo eego dawladaha kele ee ay is hayaan.
GAROWEONLINE
