Somaliland: Arday imtixaanka Shahaadiga ah u fariistay
-
- Posted On 28-05-2016, 08:11PM
HARGEYSA- Waxa gebi ahaanba si rasmi ah Somaliland uga bilaabmay imtixaanka shahaadiga ah ee fasallada afraad ee dugsiyada Sare iyo fasallada siddeedaad ee dugsiyada Hoose Dhexe ee sanad-dusiyeedka 2015-2016-ka.
Wasiirka wasaaradda waxbarashada iyo tacllinta sare Somaliland, Cabdilaahi Ibraahim Habbane, ayaa shaaciyey inuu imtixaankii bilaabmay, isagoo sheegay inay sanadkan u fariisteen 25046-arday oo iskugu jira dugsiyada sare iyo kuwa dhexe, iyadoo imtixaankaasna lagu geli doono 190-goobood.
Wasiirku waxa uu sheegay in fasalka Sideedaad sanadkan u fariisteen 45145-arday oo 9167-kamid ah wiilal yihiin, halka 5978-kamida hablo yihiin.
Dugsiyada sare ayuu sidoo kale Habbane xusay in imtixaanka u fariisteen 9901-arday oo 6493-ka mid ah wiilal yihiin, halka 3408-ka kalena hablo yihiin.
Wasiirku waxa uu kula dardaarmay dhammaan ardayda imtixaanka soo xaadiray inay kalsooni muujiyaan, isla-markaana iska dhaafaan qishka iyo waxyaabaha kale ee mustaqbalkooda lumin kara.
Somaliland waxa sanad walba imtixaanka shahaadiga ah u fadhiista arday tiro badan kuwaas oo marka dambena jaamacadaha sii gala.
Waxaase wali taagan oo aan waxba laga qaban shaqo la'aanta soo wajahda dhalinyarada waxbarta kuwaasi oo intooda badan dantu ku kallifto inay tahriibaan.
GAROWEONLINE
