Somaliland oo cafisay shakhsiyaad ku sugan Muqdishu [Daawo]

HARGAYSA, Somaliland- Madaxweynaha maamulka Somaliland Axmed Maxamed Maxamud Siilaanyo ayaa maanta cafis u fidiyay shakhsiyaad horay looga mamnuucay inay tagaan deegaanada maamulkaasi kadib markii lagu eedeeyay khayaano qaran.

Shakhsiyaadkan la saamaxay ayaa isugu jira siyaasiyiin iyo madax dhaqameed, waxaana loogu baaqay inay imaan karaan dhulkooda.

Go'aanka xukuumadda Somaliland ayaa waxaa ku dhawaaqay wasiirka wasaaradda warfaafinta Cismaan Cabdullaahi Saxardiid, wuxuuna sheegay in dowladdu ka noqotay go'aankii  hore iyadoo eegaysa wadciga lagu jiro.

Wasiirka ayaa intaasi ku daray in xukuumaddu diyaar latahay haddii ay u baahdaan gaadiid iyo qorshe kasta oo ay ku imaan karaan dalkooda.

Arrinta wadahadalka Somaliland iyo Khaatumo ayuu soo hadal qaaday, wuxuuna sheegay in wada-xaajoodka kadib qaban doonaan shir-weyne u dhaxeeya dadka gobolladaasi daga isagoo ugu baaqay in dantu ugu jirto maamulka fadhigiisu yahay magaalada Hargaysa.

Hishiiska Berbera ayuu soo hadal qaaday, wuxuuna wasiir Caddaani u mahad-celiyay Barlamanka Somaliland isagoo ku ammaanay sida midnimada leh ee ay u ansixiyeen hishiiskaas.

Arrintan ayaa lagusoo beegay xilli odoyaal iyo siyaasiyiin kasoo jeeda deegaanada Somaliland ka biyo diideen go'aamadii kasoo baxay madasha wadatashiga.

Somaliland ayaa horay u shaacisay inay ka go'day Somalia inteeda kale walow aysan ilaa hadda helin aqoonsi.

GAROWEONLINE