Somaliland:Taliye toogasho lagu dilay gobolka Saaxil
-
- Posted On 01-03-2016, 04:27PM
HARGAYSA-Taliyihii Booliska ee qaybta gobolka Saaxil Kabtan Cabdirisaaq Yuusuf Casayr, ayaa dablay hubaysan ku dileen inta u dhaxaysa degmada Sheekh iyo Berbera, sida saraakiil ciidanka katirsan noo xaqiijiyeen.
Lama garanayo cidda dilka gaysatay, balse taliyaha dhintay ayaa qayb ka ahaa wafti ku howlanaa daminta shaqaaqo ka dhalatay dhismaha dekedda macmalka ah ee Ceel-garde.
Taliyaha waxaa lasocday xubno ay kamid ahaayeen gudoomiye ku-xigeenka gobolka Saaxil oo isaga laftiisa wararku sheegayaan inuu dhaawacmay.
Majirto wax war ah oo kasoo baxay laamaha ammaanka iyo xukuumadda Somaliland, waxase la hubaa in ciidamo badan oo Boliis ah iyo saraakiil xukuumadda katiran u baxeen dhinaca magaalada Berbera ee gobolka Saaxil.
Dilka taliyahan ayaa kusoo beegmaya xilli muddo ka hor isla-gobolka lagu toogtay taliye sare oo ciidanka Boliiska ka tirsanaa, inkastoo askarigii dilkaas geystay muddo kadib laftiisa la toogtay.
GAROWEONLINE
