Chad oo soo afjartay heshiiskii iskaashiga difaaca ee Faransiiska

N'DJAMENA - Dowladda Chad ayaa Khamiistii sheegtay inay soo afjartay heshiiskii iskaashiga dhanka difaaca ee ay la gashay Faransiiska, tallaabadaas oo keeni karta in ciidamada Faransiiska ay ka baxaan dalka Afrikada dhexe.

War qoraal ah oo ay soo saartay wasaaradda arrimaha dibadda ee Chad ayaa lagu sheegay in dalkaas oo ahaa xulafada muhiimka ah ee reer galbeedka ee dagaalka kula jira mintidiinta Islaamiga ah, uu doonayo in uu si buuxda u ilaashado madax-banaanidiisa kadib eryida Faransiiska.

Waxay sheegtay in go'aanka lagu soo afjarayo heshiiska iskaashiga difaaca ee dib loo eegay sanadka 2019 uu awood u siinayo inay dib u qeexdo iskaashigeeda istiraatiijiyadeed.

Dalka Chad ayaa horey si dhow ula shaqeyn jiray ciidamada militariga ee wadamada reer galbeedka, balse waxa ay aad ugu soo dhawaadey Ruushka sanadihii lasoo dhaafay.

Go’aankan ayaa soo afjaraya taariikhda gumaysiga Faransiisku ku lahaa galbeedka iyo bartamaha Afrika ka dib markii lagu qasbay in uu ciidamadiisa kala baxay Mali, Niger iyo Burkina Faso oo ka dhaceen afgambiyo militari.

Dowladaha militariga ayaa u weecday dhanka Ruushka, oo askar calooshood u shaqeystayaal ah geeyay guud ahaan gobolka Saaxil – oo Faransiiska iyo Mareykanka isaga soo baxay.

GAROWE ONLINE