Ruux ka digay "weerarkii ugu xumaa" oo Al-Shabaab maleegeyso oo la xiray
-
WARIYAHA NAIROBI GAROWE ONLINE
- Posted On 17-02-2020, 08:20AM
NAIROBI, Kenya – Ciidanka Booliska degaanka Bomet ayaa Axadii soo qabtay nin bartiisa Facebook kaga digay weerar argagixiso oo ka dhici kara Koleej ku yaala ismaamul goboleedka Nakuru ee dalka Kenya.
Laanta dambi-daabirista oo qoraal kooban soo dhigtay boggeeda gaarka ah ee Twitter-ka ayaa shaqsiga magaciisa ku sheegtay Timothy Koech oo loo garan og-yahay Joseph Langat.
"Iyaddoo loo marayo baaritaan iyo mukhaabaraad, saraakiisu waxay xireen la tuhunsane daabacay macluumaadyo digniin ah. Joseph Langat wuxuu ka digay in Al-Shabaab qarxi karto Koleej," ayay tiri.
Fariinta la tibaaxay in Joseph Langat uu ku baahiyey Facebook ayaa ku xusay in magaciisa dhabta ah uusan ahayn Timothy Koech.
"Magaceyga dhabta ah waa Maxamed oo kasoo jeeda Soomaaliya…Kenyanku dhaqso bey wax ilaabaan," ayuu yiri.
Wuxuu raaciyey: "Waxaan Jaamacadda Garissa ku dilnay 68 arday. Weerarkaan wuxuu noqon doona midkii ugu xumaa".
Ruuxaan ayaa daboolka ka qaadey in mitidiin aad u hubeysan oo Al-Shabaab ah ay ku sugan yihiin magaaladda Rongai.
La tuhunsanaha oo laga soo xiray xaafadda Chepngaina ayaa la filayaa in maxkamad lasoo taago dhowaan, si uu u wajaho sharciga.
Bileyska ayaa tibaaxay in la hubiyey in hadii shaqsigaan uu hadalkaas u soo qoray kaftan ahaan, balse ay sii wadayaan baaritaanka.
Sikastaba, hadii lagu helo dambigaas, waxaa uu xabsi ku qaadan karaa in ka badan 20-sano, sidda uu xeerinayo sharciga la dagaalanka argagixisadda Kenya gaar ahaan qodobkiisa 26aad oo arrintaan ka hadlaya.
GAROWE ONLINE
