Mashruuca Xasan Sheekh: Qof iyo Cod mise Qof iyo Muddo Kororsi?

Madaxweynaha Soomaaliya ayaa horey uga dagaalamay hirgelinta doorashooyin dadwayne.

MUQDISHO, Soomaaliya - Magaalada Muqdisho waxaa ka socda shir muhiim ah oo u dhexeeya dowladda federaalka iyo madaxda maamul goboleedyada Soomaaliya, iyadoo afar madaxweyne goboleed ay goob joog yihiin, hase ahaatee Puntland aysan soo xaadirin.

Kulankaan waxaa diiradda lagu saarayaa arrimo muhiim ah oo ay ka mid yihiin doorashooyinka madaxda maamul goboleedyada waqtigoodu dhamaadey, iyo caqabadaha uu wajahayo Madaxweynaha Soomaaliya, Xasan Sheekh Maxamuud.

Saacado kadib markii shirka uu furmay, siyaasiyiin dhowr ah ayaa soo saaray digniino ku saabsan suurtagalnimada muddo kororsi sharci darro ah. Waxay ka digeen in haddii madaxda maamul goboleedyada ku dhaqaaqaan arrintan, ay keeni karto qalalaase siyaasadeed oo dalka dib u celin kara.

Damaca Madaxweyne Xasan Sheekh

Madaxweyne Xasan Sheekh Maxamuud, oo xilka markii ugu horreysay qabtay 2012 ilaa 2017, ayaa markii labaad dib loo doortay 2022. Muddooyinkii uu mucaaradka ahaa, Xasan Sheekh waxa uu ku doodi jiray in la ilaaliyo dimoqraadiyadda iyo sharciyadda dastuuriga ah.

Si kastaba ha ahaatee, tan iyo markii dib loogu doortay xilka, waxaa soo ifbaxay eedeymo ku saabsan in uusan dan ka laheyn dhaqan gelinta qodobbadii uu ku dhaliili jiray dowladdii ka horreysay ee uu hoggaaminayey Maxamed Cabdullaahi Farmaajo.

Madaxweyne Xasan Sheekh waxaa lagu eedeeyay in inta uu xilka hayay uu musuqmaasuqa gaarsiiyay heerkii ugu sarreeyay. Waxaa sidoo kale lagu dhaleeceeyay in uu xulafaysi siyaasadeed sameystay, kuna wareegay kooxo dano gaar ah leh, taasoo sii xumeysay midnimadii dalka.

Intaa waxaa dheer, waxaa lagu eedeeyay in uu curyaamiyay hay’adaha dowladda sida Baarlamaanka Federaalka, gaar ahaan Aqalka Sare. Isagoo aan la tashan cid kale ayuu furey dastuurkii federaalka, arrintaas oo muran hor leh dhalisay.

Muddo Kororsi iyo Gorgortanka Siyaasadeed

Maamulada madaxdoodu waqtigu ka dhacayo, gaar ahaan maamulka Koonfur Galbeed, ayaa la sheegayaa in uu hadda socdo gorgortan muddo kororsi loogu sameynayo. Arrintan ayaa abuurtay tuhun ku saabsan in Madaxweyne Xasan Sheekh uu qorsheynayo in uu sameeyo muddo kororsi isaga oo ku dhuumanayo doorashada qof iyo cod ah.

Falanqeeyayaasha siyaasadda Soomaaliya ayaa tilmaamaya in maamul goboleedyada iyaguna ay dani ugu jirto muddo kororsiga, iyagoo raadinaya in xilkooda uu socdo inta laga gaarayo dhammaadka xukuumadda Xasan Sheekh sanadka 2026.

Kadib burburka dowladda dhexe ee Soomaaliya, waxaa soo noqnoqday in madaxda xilka ugu sarreysa ay abuuraan hubanti la’aan ku saabsan doorashooyinka si xukunka usii joogaan.

Haddaba, su’aasha ugu weyn ayaa ah: Madaxweyne Xasan Sheekh ma laga yaabaa in uu hirgeliyo qorshihii uu horey u diidey isaga oo adeegsanaya mashruuca doorasho qof iyo cod ah soo xiranaya shaati ka duwan kuwii uu horey u wadan jiray?

GAROWE ONLINE