Trump Oo Ku Wareersan Iran: Dagaal Kale Mise Heshiis Cusub?

FAALADA WARKA: Madaxweynaha Mareykanka Donald Trump wuxuu hadda wajahaya laba doorasho oo adag: inuu sii ballaariyo dagaalka, isagoo qaadaya kharash weyn oo dhinacyada bani’aadannimada, dhaqaalaha iyo siyaasadda ah si uu u jebiyo faa’iidada cusub ee Iran ka heshay marin-biyoodka Strait of Hormuz, ama inuu dib u soo nooleeyo heshiis xabbad-joojin iyo is-afgarad lagu dhaliilay inuu Iran siinayo faa’iido dhaqaale oo ballaaran iyadoo aan wax xal waara ah laga gaarin colaadda.

Xiisaddan cusub, oo qaraxday saddex toddobaad un kadib markii Trump saxiixay heshiiskii is-afgaradka (MOU) ee uu ku tilmaamay “heshiis uu isaga oo keliya suuragelin karo”, ayaa muujisay in dadaalkii militari ee Mareykanku uusan weli gaarin ujeeddooyinkii la filayay.

Dhab ahaantii, duqeymihii cusub ee Mareykanka ayaa abuuraya sawir ah in Washington ay halis ugu jirto inay bilowdo wareeg labaad oo dagaal ah si ay u saxdo cawaaqibkii ka dhashay dagaalkii koowaad. Weerarrada Iran ay ku qaaday maraakiibta ganacsiga waxay muujiyeen inay ka go’an tahay inay sii haysato saameynta ay ku yeelatay Strait of Hormuz, oo ah marin ay maraan qayb weyn oo saliidda iyo gaaska caalamka.

Wararku waxay sheegayaan in Tehran ay doonayso inay ka dhigato marin-biyoodkan il dhaqaale, iyadoo ku khasbaysa maraakiibta inay maraan waddooyin ay iyadu maamusho, taas oo xoojinaysa saameynteeda gobolka.

Dhanka kale, heshiiskii MOU-ga ayaa u muuqda mid aan awood u lahayn inuu xakameeyo xaaladda. Qoraalka heshiiska, oo ay hormuud ka ahaayeen ergayga Mareykanka Steve Witkoff iyo soddogga Trump, Jared Kushner, ayaa lagu dhaliilay inuu ahaa mid aan lahayn qodobo adag oo lagu dhaqan-gelin karo isla markaana si weyn ugu tiirsanaa ballanqaadyada Iran.

Trump ayaa intii uu ka qaybgalayay shir madaxeedkii NATO ku sheegay in heshiiskaasi uu “dhamaaday”, isagoo Iran ku tilmaamay dal “waalan”. Si kastaba ha ahaatee, wuxuu isla markaa sheegay in wada-hadalladu sii socon karaan haddii gorgortamayaashu ay rabaan, taas oo sii xoojisay aragtida ah in istaraatiijiyadda Mareykanka aysan lahayn jiho cad.

Haddii Mareykanku doorto inuu sii kordhiyo dagaalka, fursadaha jira waxaa ka mid noqon kara duqeymo lagu beegsado kaabeyaasha rayidka ama tamarta Iran, hawlgallo militari oo ka dhaca xeebaha Strait of Hormuz, ama xitaa isku day lagu qabsanayo xarunta dhoofinta saliidda ee Kharg Island.

Si kastaba ha ahaatee, tallaabo kasta oo noocaas ah waxay yeelan kartaa cawaaqib aad u culus. Waxay kordhin kartaa khasaaraha ciidamada Mareykanka, waxayna horseedi kartaa weerarro aargoosi ah oo lagu qaado saldhigyada Mareykanka iyo xulafadiisa Khaliijka. Sidoo kale waxaa halis geli kara xarumaha saliidda iyo gaaska ee gobolka, taas oo dib u hurin karta qalalaase cusub oo ku yimaada suuqyada tamarta caalamka.

Sidaas darteed, maamulka Trump wuxuu galay marxalad ay adag tahay in laga helo xal fudud. Doorasho kasta oo uu qaato waxay wadataa khatar siyaasadeed, mid amni iyo mid dhaqaale, halka su’aasha ugu weyn ay weli taagan tahay: ma sii ballaarin doonaa dagaalka si uu u beddelo xaaladda jirta, mise wuxuu dib ugu laaban doonaa wadahadal aan weli muujin inuu xal waara keeni karo?

GAROWE ONLINE