Iran oo dil toogasho ku xukuntay "siyaasi basaas u ahaa UK"

Alireza Akbari ayaa soo noqdey wasiir ku xigeenka gaashaandhiga intii u dhaxeysay 1997 illaa 2005.

TEHRAN, Iran - Iran ayaa dil ku xukuntay sarkaal sare oo hore oo lagu eedeeyay inuu basaas u ahaa hay’adda sirdoonka Britain ee MI6, sida ay sheegtay Mizan News oo xiriir la leh hay'ada garsoorka.

Alireza Akbari, wasiir ku xigeenkii hore ee gaashaandhigga, wuxuu si dhow ugu xirnaa hay'adda sirdoonka Ingiriiska, wuxuuna ahaa "mid ka mid ah kuwa ugu muhiimsan ee gudaha u galay" MI6 "xarumaha xasaasiga ah iyo istiraatiijiyada ee dalka", ayuu yiri baahinta.

Sida laga soo xigtay Mizan News, Akbari "wuxuu ururiyay macluumaadka muhiimka ah ee la xiriira dalka wuxuuna u gudbiyay adeegga sirdoonka Ingiriiska si buuxda oo xog iyo bartilmaameed leh".

Akbari, oo ka tirsanaa golaha wasiirada ee madaxweynihii hore ee Iran Mohammad Khatami (1997-2005), ayaa la xiray "kadib howlgalo dheer oo dhinacyo badan leh" oo ay fulisay wasaaradda sirdoonka Iran, ayaa lagu yiri bayaanka, iyadoo aan la cayimin waqtiga.

Shaacinta xukunka ayaa timid maalmo ka dib markii ay soo baxeen warar sheegaya in sarkaal sare oo Iran ah "la aqoonsaday, la xiray lana tijaabiyey" oo lagu eedeeyay basaasnimo.

Iyadda oo ka falcelinaya ku dhawaaqista, Britain ayaa Arbacadii ku boorisay Iran inay sii deyso Akbari, oo sidoo kale lagu waramay in uu haysto dhalashada Ingiriiska.

In ka badan toban qof oo mudaaharaadayaal ah ayaa ilaa hadda lagu xukumay dil toogasho ah sababo ku aadan ka qeybgalka banaanbaxyaddii rabshadaha sababay iyadoo afar horena loogu fuliyay.

GAROWE ONLINE