Madaxda Federaalka oo durba bilaabay fulinta ballamadii ay la galeen Xildhibaanada

Madaxweynaha JFS ayaa durba bilaabay xil u magacaabista xubnaha baarlamaanka.

Muqdisho, Soomaaliya - Madaxweynaha JFS, Xasan Sheekh Maxamuud iyo Guddoomiyaha Baarlamaanka Sheekh Aadan Maxamed Nuur (Madoobe), ayaa xilal u magacaabay qaar ka mid ah xildhibaanada labada gole ka dib markii ay meelmariyeen cutubyada ugu horreeya ee dastuurka muranka ka taaganyahay.

Madaxweynaha ayaa Xildhibaan Cabdirashiid Maxamed Nuur jilley u magacaabay Ergeyga Gaarka ah ee Arrimaha Caafimaadka iyo Nafaqada. Cabdirashiid ayaa ah siyaasiyiinta aad ugu dhow Madaxweynaha Jubbaland Axmed Madoobe.

Xildhibaanka ka tirsan Golaha Shacaka lagana soo doortay Dowlad-Goboleedka Jubbaland ayaa sidoo kale ka mid ahaa xidhibaanada hormuudka ka ahaa ololaha qabyo tirka dastuurka, kuwaas oo ballaan qaadyo u fidiyay madaxweynaha Dalka.

Dhanka kale, Guddoomiyaha Golaha Shacabka Sheekh Aadan Maxamed Nuur (Madoobe) iyo Ku-simaha Guddoomiyaha Aqalka Sare ayaa si wadajir ah u magacaabay guddiga saaxibtinimada Baarlamaanada Soomaaliya iyo Talyaaniga.

Guddiga ayaa ka kooban 8 xubnood oo kala ah, Xil. Maxamed Cali Xasan, Xil. Xuseen Maxamed Nuur, Xil. Aweys Xuseen Moalim, Xil. Cabdullahi Xasan Rooble, Xil. Cali Xasan Ibraahim, Xil. Maxamed Aadan Macallin, Sen. Leyla Ahmed Ismail, Sen. Xuseen Maxamed Dahir.

Wararka ayaa sheegaya in Magacaabistan ay bilow u tahay isku shaandheyn lagu sameynayo Golaha Wasiirada, xilalna loo magacaabayo xildhibaano qeyb ka qaatay ansixintii dastuurka.

GAROWE ONLINE