12 qof oo ku dhimatay weerar ka dhacay deegaanka Qorilay gobolka Sool
-
- Posted On 23-09-2015, 11:07AM
23 September, 2015(GO)-Wararka ka imaanaya deegaanka Qorilay ee gobolka Sool ayaa sheegay inay dhinteen in ka badan 12 ruux, ka dib weerar xalay lagu qaaday tuuladaasi.
Sababta weerarka ayaa lagu sheegay colaad muddo soo socotay oo u dhaxeysa laba beelood oo ka kala tirsan Dhulbahante iyo Cumar Maxamuud.
Weerarka ayaa sidoo kale sababay dhaawaca tiro ka badan sagaal ruux, waxaana lagubay gaawari dhawr ah halka kuwa kale weerarka lagu kaxaystay sida uu sheegay guddoomiyaha degmada Burtinle oo la hadlay Garowe Online.
Xaaladda ayaa haatan dagan, balse waxaa laga cabsi qabaa in dagaal mar kale dhaco, maadaama sida wararku nagu soo gaarayaan ay jiraan ciidamo ka soo baxay dhinaca Laascaano iyo labada mallayshiyo oo isku horfadhiya goobta dagaalku ka dhacay.
Dowladda Puntland ilaa hadda wax kama qaban coladda oo muddo socotay, waxaana jirta waxgarad isu xilqaamay daminta arrintaasi, balse xukuumadda ka waayay kharashaadkii ay ku tagi lahaayeen deegaanka lagu diriray.
Maaha markii ugu horraysay oo daagaalku dhexmaro labada beelood, balse waxa uu soo socday muddo ka badan 10 sano, waxaana fashilmay hishiisyo la dhexdhigay beelaha dagaalamaya.
GAROWEONLINE
