Air Djibouti oo duulimaadyo toos ah ka hirgelineysa Puntland
GAROWE, Puntland – Shirkadda Diyaaradaha Jabuuti ayaa ku dhawaaqday in duulimaadyo toos ah ay ka hirgelineyso Garowe, caasimadda dowlada Puntland.
War qoraal ah oo kasoo baxay Air Djibouti ayaa lagu sheegay in duulimaadka uu bilaaban doono 22-ka bisha December ee sanadkan 2019-ka.
Duulimaadka ay diyaaradan ku tageyso Garowe ayaa noqon doona laba jeer todobaadkii, sidda ku xusan war-saxaafadeedka.
Air Djibouti ayaa kamid noqoneyso diyaaradaha caalamiga ah ee ka faa'iideysanaya fursadaha ka jira degaanadda maamul goboleedka Puntland.
Ethiopian Airlines, mid kamid ah shirkadda diyaaradaha ugu fiican Afrika, ayaa bishii June, 2019 duulimaadyo ka bilowday Puntland.
Wasaaradda Duulista Hawada iyo Garoomadda Puntland ayaa dhowaan shaacisay in shirkado kale oo caalami ah ay codsiyo u soo gudbiyeen.
Sikastaba ha ahaatee, Air Djibouti iyo Ethiopian Airlines ayaa safka hore kaga jira shirkaddaha caalamiga ah ee ku loolamaya suuqa furan ee Soomaaliya.
GAROWE ONLINE