Al-shabaab oo u hanjabtey shaqaalaha Qaramada Midoobey
-
- Posted On 22-04-2015, 01:33PM
April 22, 2015 (GO)- Af-hayeenka Al-shabaab Cali Dheere ayaa ka hadlay weerarkii is-miidaaminta ahaa ee labo maalmood kahor ay magaalada Garowe kula beegsadeen gaari bas ah oo sidey qaar kamid ah shaqaalaha Qaramada Midoobey.
Cali Dheere wuxuu sheegay inay sii wadi doonaan weerarrada caynkan oo kale ah isagoo xusey in Qaramada Midoobey qayb ka tahay dhibaatada Soomaaliya sidaas darteed mar walba ay beegsan doonaan xarumaha iyo shaqaalaha Qaramada Midoobey.
"kuwa sheegta Qaramada Midoobey inta ay joogaan Soomaaliya kuma nabad galayaan, waxay dhadhamin doonaan rasaasteena" ayuu yiri.
Weerarkii ismiidaaminta ahaa ee labo maalmood kahor ka dhacay Garowe waxaa ku geeriyoodey lix qof oo afar kamid ah ajnebi ahaayeen, waxaa sidoo kale ku dhaawacmey todoba qof oo shan kamid ahi Soomaali yihiin.
Dowladda Puntland, Dowladda Federaalka iyo xafiiska Qaramada Midoobey ee Soomaaliya ayaa si weyn u cambaareeyey weerarkaas kuna tilmaamey fal waxashnimo ah.
Al-shabaab ayaa horay deegaannada ay ka taliso uga mamnuucdey hay'adaha Qaramada Midoobey, maadaama ay ku eedeysey inay basaas u yihiin Dowladda Federaalka iyo ciidamada AMISOM.
GAROWE ONLINE
