Amniga degmada Burtinle oo la adkeeyay
-
- Posted On 13-06-2016, 02:30PM
GAROWE- Ammaanka degmada Burtinle gobolka Nugal, ayaa aad loo adkeeyay, waxaana ciidamada Boliisku maalmihii ugu dambeeyay samaynayeen howgallo kala duwan kuwaas oo dhacayay habeen iyo maalin.
Arrintan ayaa la sheegay in looga hortagayo weeraro ay gaystaan kooxda Al Shabaab inta lagu guda jiro bisha barakaysan ee Ramadaan.
Taliyaha Saldhigga Degmada Burtinle Saciid Cabdi Axmed, oo la hadlayay Radio Garowe, ayaa sheegay inay jiraan dad badan oo lasoo qabtay mudadii baaritaanku socday, wuxuuna tilmaamay inay u kala soocaan dabiile iyo dambi laawe dib xorriyadiisa loo siiyo.
Wuxuu sheegay in amniga degmadu uu aad u wanaagsanyahay, balse wali socdo howlgallada amniga lagu sugayo.
Dhinaca kale, waxaa sidaasi si lamid ah amnigooda loo adkeeyay magaalooyinka waaweyn ee Puntland iyadoo xilliyada habeenkii baaritaano kala duwan lagu sameeyo gaadiidka iyo dadka jidadka isticmaalaya.
GAROWEONLINE
