Danjire Nicholas Kay oo booqday xabsiga dhexe ee Garowe
-
- Posted On 12-03-2015, 08:54AM
March 12, 2015 (GO)- Ergeyga Qaramada Midoobey ee Soomaaliya Nicholas Kay oo maalintii labaad Garowe ku sugan ayaa maanta booqdey xabsiga dhexe ee magaalada Garowe.
Booqashada Danjire Kay ee xabsiga waxaa ku weheliyey Wasiirka Amniga Xasan Cismaan Alloore iyo Wasiirka Warfaafinta Cabdiweli Xirsi Indho-guran.
Saraakiil ka tirsan ciidamada asluubta oo Taliye Cali Nuur kamid ahaa ayaa wafdigaas si diirran usoo dhoweeyey.
Mas'uuliyiinta ayaa kormeeray dhammaan qaybaha uu xabsigu ka kooban yahay iyagoo sidoo kale xog wareysi la yeeshay qaar kamid ah maxaabiista.
Nicholas Kay ayaa gelinkii dambe ee shalay madaxtooyada Garowe kula kulmey Madaxweynaha Puntland Cabdiweli Maxamed Cali Gaas.
Labada mas'uul ayaa kulankooda arrimo dhowr ah diiradda ku saarey, waxaana ugu muhiimsanaa Higsiga 2016, sugidda amniga, la-dagaalanka Al-shabaab iyo weliba sidii loo sii dardar gelin lahaa mashaariicda dhanka horumarinta la xiriira ee Qaramada Midoobey ay ka waddo Puntland.
Xabsiga dhexe ee Garowe oo kamid ah kuwa ugu casrisan guud ahaan Soomaaliya, waxaa ku jira qaar kamid ah maxaabiista burcad badeedka ee laga keenay dalka Seychelles iyo maxaabiis kale oo Soomaali ah kuwaasoo xukunno culus horay loogu ridey.
GAROWE ONLINE
